بين غاليليو وآينشتاين من جهة والحجي ريتشارد بانر والباشا ابراهيم الفقي وعمو محمد أوز من جهة (سؤال وجواب مع مدّعي البرمجة اللغوية العصبية)

كُتبت في: 11/04/2019

أبدأ بما سأختم: 

 “A central lesson of science is that to understand complex issues (or even simple ones), we must try to free our minds of dogma and to guarantee the freedom to publish, to contradict, and to experiment. Arguments from authority are unacceptable.” 

― Carl Sagan, Billions & Billions: Thoughts on Life and Death at the Brink of the Millennium

 “One of the great commandments of science is, 'Mistrust arguments from authority'” 

― Carl Sagan, The Demon-Haunted World: Science as a Candle in the Dark

من أكثر المغالطات التي يقع فيها الناس بشكل عام ومدّعي البرمجة اللغوية والعلم الزائف بشكل خاص هي مغالطة التوسل بالمرجعية أو الاحتكام إلى السلطة Argument from authority وهي تعني الاعتماد على رأي شخص أو جهة ما كدليل على صحة الطرح والكلام. هذه الطريقة قد تصلح في نقاش ديني أو سياسي أو أي شيء من هذه الأشياء غير القائمة على الدليل والبرهان ولكن ليس مع العلم أو في نقاش علمي.

لماذا؟؟

لأن في العلم لا يوجد كهنة ولا مشايخ ولا مرجعيات فالمرجعية هي للدليل العلمي فقط وكلام أكبر شخص حتى لو كان عالم يساوي الصفر ما لم يستند على دليل علمي، لذا إذا اعتقدت أن دعم جميع سياسيّ الأرض أو فنانيها أو مشاهيرها أو حتى حملة شهاداتها أو علمائها دون وجود دليل علمي يجعل من طرحك صحيحًا فأنت مخطئ... وسأذكر العديد من الأمثلة، ولكن قبل ذكر الأمثلة سأورد هاتين القصتين:

عندما وقف غاليليو Galileo Galilei أمام جميع الكهنة والحكام وحتى العلماء وقتها (ممن توارثوا علمهم عن من سبقهم) وطلبوا منه أن يعترف أن الأرض ثابتة والشمس تدور حولها، فوقف وقلهم (E pur si muove/ Eppur si muove/ And Yet It Moves/ Albeit it does move/ ومع ذلك فهي تدور / ومع ذلك فهي تتحرك) وضرب بكل سلطتهم وكلامهم عرض الحائط، ليش؟ لأنو الدليل العلمي أقوى من كل السلطات ومهما كانت شهادتك أو مكانتك فهاد الشي ما بخولك تحكي حرف بدون دليل علمي.

وكمان آينشتاين Albert Einstein لما خبروه أنو في مية عالم رح يصدروا عدة كتب ضد نظريتو النسبية قلهم وهوي وعم يضحك: ليش مية عالم وعدة كتب، بيكفي عالم واحد أو كتاب واحد أو دليل واحد أنو نظريتي مو صحيحة لينتهي الموضوع. (قد تكون هذه القصة غير حقيقية ولكن كان هنالك انتقادات حقًا وشفنا مبارح شو طلع قيمة هالانتقادات أمام الدليل العلمي اللي قدمو آينشتاين).

بنرجع لكيفية استخدام دعاة العلم الزائف لهذه المغالطة المنطقية مغالطة التوسل بالمرجعية أو الاحتكام إلى السلطة Argument from authority..

- الحجي ريتشارد باندلر Richard Bandler (الأب الروحي للبرمجة اللغوية العصبية): المؤسس والمؤلف المساعد للعلم الزائف المدعو بالبرمجة اللغوية العصبية إلى جانب الحجي الثاني المسمى Robert Spitzer. يطلق على نفسه لقب دكتور على موقعه بالرغم من أنه ليس طبيب ولا يحمل دكتوراه بل يحمل شهادة في الفلسفة وعلم النفس وماجستير في علم النفس (يعني أنا معي شهادات أكتر منو إذا بدنا نلعب طرنيب بالشهادات بس العلم مو هيك). عندو كتب تجارية يعني مو علمية والفرق بين الكتاب التجاري والعلمي أنو التجاري أي شخص فيه ينشر اللي حابوا ما دام لاقى حدا يطبعلو ياه أو هوي دفع حق الطباعة بدون أي تدقيق علمي أو مرجعي ولا يعتبر كتاب معتمد بأي مجال أو بحث علمي. يعني مرجعية هاد الشخص وكتبو تساوي الصفر. ومع ذلك فهو مدلس وكذاب وبيسمي حالو دكتور.

- الحجي ابراهيم الفقي (الأب الروحي للعلم الزائف المسمى التنمية البشرية): حكيت عنو مطولًا سابقًا، نفس الكذب والتدليس، يسمي نفسو دكتور كمان بالرغم من أنو مشتري الدكتوراه تبعو من جامعة وهمية وأنشأ عدة مراكز وهمية (للمزيد).

- الحجي محميت (محمد) أوز Mehmet Oz (أحد مروجي علوم الطاقة الزائفة من تشاكرا ورايكي وغيرها ومروجي العلاجات والخلطات السحرية عبر برنامج الحجة أوبرا): وهاد كمان مدلس ومزور وتمت محاكمتو واستجوابو قدام اللجنة القضائية بمجلس الشيوخ الأمريكي بسبب منتجاتو الكاذبة، ولما سألتو عضوة مجلس الشيوخ عن ترويجو لمنتجات صحية أو تغذوية وأنو كيف بيوصفها بأنها معجزة مع أنو بهديك الفترة اللي حكاها كان في دراسة وحدة منتشرة عن المنتج وهيي بالهند وعلى 16 شخص وممولة من قبل الشركة المنتجة؛ كان ردوا ببساطة: أنو هوي برنامجو عن الأمل وأنو شاف دراسات مع أنها ما كتير مثبتة وأنو في أشخاص ارتاحولوا للمنتج وأنو عم يعطي الناس نفس اللي بيوصفو لعيلتو (إي إذا عيلتك بتآمن بالسحر والمعجزات شو ذنبها هالعيلة) لا والأخ وصف تلات منتجات أنها معجزة وكلها مو مثبتة وأنو بيستخدم لغة شغوفة بالبرنامج.. ومواصفات المنتجات (المعجزة) اللي أصغر طالب بمجال التغذية بيعرف أنها حكي فاضي واللي روجلها الأخ هيي كالتالي: بتخسرك وزن مدري كم باوند بالأسبوع أو الشهر بغض النظر لعبت رياضة أو ما لعبت وبغض النظر شو بتاكل.. ولا الأحلى أنو بتساعدك أنك تخسر وزن بشكل دائم.. (رابط الاستجواب)..

النهفة أنو كل هدول اللي بيتمسحوا فيهم دعاة العلم الزائف هني زائفين ومدلسين وما بيختلفوا كتير عن "الدكتور" مايك فغالي مؤلف علم التيليكوزموغنوسيز Telecosmognosis اللي حكيت عنو سابقًا.

يعني مو بس علمكم زائف كمان قدوتكم ومعلمينكم زائفين؛ يا سيدي حتى لو معلمينكم مو زائفين بيضل كلامهم حقو صفر بدون دليل علمي...

وأختم بما بدأت:

 “A central lesson of science is that to understand complex issues (or even simple ones), we must try to free our minds of dogma and to guarantee the freedom to publish, to contradict, and to experiment. Arguments from authority are unacceptable.”   ― Carl Sagan, Billions & Billions: Thoughts on Life and Death at the Brink of the Millennium

 “One of the great commandments of science is, 'Mistrust arguments from authority'”  ― Carl Sagan, The Demon-Haunted World: Science as a Candle in the Dark

واللي بيعني باختصار أنو أحد الدروس المحورية والوصايا العظيمة في العلوم هوي أنو لفهم القضايا المعقدة (أو حتى القضايا البسيطة)، يجب أن نحاول تحرير عقولنا من العقائد وضمان حرية النشر والتناقض والتجريب. فحجج السلطة والمرجعيات غير مقبولة ولا يجب الثقة بها.