جامعة دمشق "كيف تفشل بنجاح"

كُتبت في: 10/11/2020

عم أكتب هاد الپوست وأنا بكامل الأسف على الحال اللي وصلنالو.. الأسف على دكاترتنا وعلى جامعاتنا وعلى مستوى التعليم اللي وصلنالوا...

بلا مقدمات طويلة وخلونا نفوت بالموضوع مباشرة.. الصديق Raed Shaiia بعتلي الكتاب اللي ظاهر غلافو بالصور (صورة 1) واللي هو المفروض يكون كتاب علمي أكاديمي صادر عن جامعة دمشق وقائم على إعدادو كونسيلتو وكونشيرتو من الدكاترة الجامعيين المختصين (10 دكاترة متل مو واضح بالصورة 1) والمفروض أنو هدول الدكاترة كل واحد يكتب جزء أو يتشاركوا بالإعداد لكن بكل الأحوال لازم يقرؤوا بقية الأجزاء حتى لو ما شاركوا فيها لأنو بالنهاية العمل يحمل اسمهم.. وبعد فريق الإعداد بيجي فريق التدقيق العلمي اللي كمان مكون من دكتورين (كما هو واضح من الصورة واللي للغرابة هني من نفس فريق الإعداد!!) ومهمة هاد الفريق كبيرة وتتضمن فيما تتضمن قراءة الكتاب والتأكد من المعلومات والمصادر ومطابقة المعلومة مع المصدر والتأكد من صحتها العلمية وعدم السماح بانتقال الكتاب للمراحل اللاحقة دون التأكد أنو موافق للمنهجية العلمية بشكل كامل لأنو الكتاب مرجع لطلاب جامعيين عم يدرسوا بجامعة المفروض عم تنقلهم العلم بمنهجية علمية..

طيب خلونا نقيم هالكتاب علميًا:

ما رح أحكي بعدد المصادر وهيك أمور رح فوت فورًا على المحتوى العلمي.. بالصفحات 22-23 في فقرة عنوانها (سادسًا. التطور والانقراض Evolution & Extinction):

بهي الفقرة وبعد مو حاكيين عن نظرية التطور (وركزوا معي أنكم بتعرفوا أنها نظرية لأنو رح نحتاجها بعدين) وحاكيين دورها بشرح التشابه بين الكائنات الحية (على الرغم من استخدامكم كلمات متل "ربما" و"العديد" بس كمان مسامحين).. بتجوا بالآخر وبتكتبوا:

"مع ذلك، فإن النقض الأساسي لنظرية التطور هو كونها قاصرة عن تفسير المستوى العالي في الترتيب Order في الكائنات الحية التي ظهرت لاحقًا في السلسلة التطورية" وأضفتم "مع العلم أن قانون الترموديناميك يشير إلى أن المنظومات، ومنها المنظومات الحية، تسعى إذا تُركت إلى الفوضى وليس إلى الترتيب!"...

للصراحة ما بعرف مين وين بدي أبلش وكيف لازم أشرحلكم الكمية المخيفة من الأخطاء العلمية اللي لو تقدم هاد الكتاب إلي أنا شخصيًا كنت رفضتو بس لأنو يحتوي هالجملة لأنها بتعطي فكرة عن منهجية اللي كاتبو.. ورح أشرح ليش:

أولًا- أنتو كاتبين أنها "نظرية" التطور يعني نظرية علمية وإذا ما بتعرفوا شو يعني نظرية يا ريت تقرؤوا هاد المقال، وإذا ما حبيتو تقرؤوه وقلتو حكي فيسبوك أنا رح أعطيكم مصدر تاني تقرؤوا منو وهوي كتابكم هاد نفسو اللي أنتو كاتبين فيه بالصفحات 24-25:

يعني (وياللمصادفة) بعد صفحة وحدة من الحكي عن نظرية التطور، كاتبين:

"تحوّل جزء كبير من الفرضيات Hypotheses إلى نظريات Theories استندت إلى آلاف البحوث الهادفة" لشو استندت؟ إلى آلاف البحوث.. طيب بالصفحة اللي بعدها كاتبين بتعريف النظرية العلمية "عندما تُثبت الفرضية صوابيتها وتدعمها فرضيات ونتائح أخرى صحيحة وموثوقة يمكن أن تتحول الفرضية إلى نظرية علمية راسخة".. تدعمها شو؟ "فرضيات ونتائح أخرى صحيحة وموثوقة".. تتحول إلى شو؟ "إلى نظرية علمية راسخة".. يعني للصراحة ما بعرف شو بدي أحكي بس إذا اللي كاتبين الكتاب مو فهمانينو فلا عتب على الطلاب...

طيب خلونا ننسى التعاريف وهالحكي النظري ونجي على المشكلة اللي طرحتوها حول نظرية التطور ونشوف إذا صح أو غلط:

مشكلتكم مكونة من شقين:

- الشق الأول: تقولون "فإن النقض الأساسي لنظرية التطور هو كونها قاصرة عن تفسير المستوى العالي في الترتيب Order في الكائنات الحية التي ظهرت لاحقًا في السلسلة التطورية"

حابب اسألكم: ما هو تعريف الترتيب؟ هل كلما كان الشكل بالنسبة ألنا أعقد كل ما كان ذو ترتيب أكبر؟ يعني أنتو معتبرين أنو المشكلة بس مع الكائنات الحية التي ظهرت لاحقًا في السلسلة التطورية واللي هيي حسب مفهومكم أعقد وأكثر ترتيبًا من اللي قبلها وهاد ما بيصير علميًا حسب قولكم؟.. طيب شو رأيكم بالكائنات الأبسط والتي ظهرت أولًا بالسلسلة التطورية هل هي لا تعتبر شكل أعقد وأرتب من اللي قبلها؟ أليست الخلية الحية الأولى شكل أعقد وأكثر ترتيبًا حسب مفهومكم ولا كمان عندكم مشكلة بتطور كل الأحياء من الأساس ومستحيين تقولوا وعندكم مشكلة بنشوء الحياة من مواد لا عضوية لا حية وبتعتبروه ذو نشوء معجزي؟ طيب رح إجي معكم واعتبر أنكم رافضين التطور ونشوء الحياة كلها لأنها انتقال من الفوضى للترتيب حسب قولكم، طيب شو مشان نشوء الأرض؟ أليست تحول الأرض من كتلة محترقة للشكل الحالي شيء أكثر تعقيد وترتيب حسب مفهومكم؟ ولا كمان بتحبوا تنكروا علم الفلك والجيولوجيا متل ما أنكرتوا البيولوجيا... الترتيب يا أعزائي الدكاترة هو توصيف حسب الإطار المرجعي وما يعتبر ترتيب ضمن إطار مرجعي صغير قد يكون فوضى ضمن إطار كبير والعكس أحيانًا صحيح (حول الإطار المرجعي).. وإذا بدنا نتبع أسلوبكم باعتبار أن أي شيء يقول بتحول شيء ما من شكل أبسط حسب مفهومنا إلى شيء أعقد أنه خاطئ معناها رح نرفض نشوء الكون ونشوء المجرات ونشوء الأرض ونشوء الحياة إلخ ونضل بنظرية أنو كل شي ظهر فجأة وبأمر خفي (ما بعرف ليش شامم ريحة وزارة الأوقاف وأزلامها هون)...

- الشق الثاني: تقولون "مع العلم أن قانون الترموديناميك يشير إلى أن المنظومات، ومنها المنظومات الحية، تسعى إذا تُركت إلى الفوضى وليس إلى الترتيب!"

يقول القانون الثاني للترموديناميك: 

The Second Law of Thermodynamics states that the state of entropy of the entire universe, as an isolated system, will always increase over time.

The second law of thermodynamics states that the total entropy of an isolated system can never decrease over time, and is constant if and only if all processes are reversible. Isolated systems spontaneously evolve towards thermodynamic equilibrium, the state with maximum entropy.

يعني:

ينص القانون الثاني في الترموديناميك على أن حالة إنتروبية الكون بأكمله، كنظام معزول، ستزداد دائمًا بمرور الوقت. وأن الإنتروبيا الكلية لنظام معزول لا يمكن أن تنخفض أبدًا بمرور الوقت، وهي ثابتة إذا وفقط إذا كانت جميع العمليات قابلة للعكس. وأن الأنظمة المعزولة تتطور تلقائيًا نحو التوازن الديناميكي الحراري، الحالة ذات الانتروبيا القصوى.

شيلونا من أنو اللي استخدم هالحجة، وآسف على هالتعبير، لا يفقه شيئًا لا بالترموديناميك ولا بالانتروبيا.. انسوا هاد كلو ولاحظوا معي كم مرة القانون عاد كلمة نظام (منظومة/جملة) معزول isolated system.. طيب حدا من اللي كتب هالكلام أو قراه أو دققو حب أو جرب يشوف شو يعني نظام أو جملة معزولة؟

An isolated system is a thermodynamic system that cannot exchange either energy or matter outside the boundaries of the system. There are two ways in which this may occur:

The system may be so distant from another system that it cannot interact with them.

The system may be enclosed such that neither energy nor mass may enter or exit.

النظام المعزول هو نظام ديناميكي حراري لا يمكنه تبادل الطاقة أو المادة خارج حدوده، ويمكن أن يحدث هذا بطريقتين:

قد يكون النظام بعيدًا جدًا عن نظام آخر بحيث لا يمكنه التفاعل معه أو قد يتم إرفاق النظام بحيث لا تدخل أو تخرج الطاقة ولا الكتلة.

يعني لا المجرة نظام معزول ولا النظام الشمسي ولا الأرض ولا الأحياء.. هل الأحياء نظام معزول عن باقي الأحياء والظروف البيئية المحيطة لحتى ينطبق عليها هاد القانون؟!!!!!

طيب لا تصدقوني أنا، اعتبروني شخص ما بعرف شو عم أحكي بس يا ترى ما بتصدقوا أول مرجع آخدين كتابكم منو، وحتى آخدين هالفكرة منو؟ الفرق أنو المرجع طارحها ومجاوب عليها.. بس أنتو (لغاية في نفس يعقوب ووزارة الأوقاف) أخدتو السؤال من دون الجواب...

الكتاب بيسأل: Living cells—by surviving, growing, and forming complex organisms—are generating order and thus might appear to defy the second law of thermodynamics. How is this possible?

" الخلايا الحية - من خلال البقاء على قيد الحياة، والنمو، وتشكيل كائنات حية معقدة – تنتج ترتيبًا وبالتالي قد تبدو أنها تتحدى القانون الثاني للديناميكا الحرارية. كيف يكون هذا ممكنا؟"

واللي هوي هاد طرحكم تمامًا.. 

بعدين مجاوب الكتاب نفسو عليه بنفس السطر.. تخيلو نفس السطر..

The answer is that a cell is not an isolated system: it takes in energy from its environment in the form of food, or as photons from the sun (or even, as in some chemosynthetic bacteria, from inorganic molecules alone). It then uses this energy to generate order within itself.

" الإجابة هي أن الخلية ليست نظامًا معزولًا: فهي تأخذ الطاقة من بيئتها في شكل طعام ، أو كفوتونات من الشمس (أو حتى، كما هو الحال في بعض البكتيريا المصنعة كيميائيًا، من الجزيئات غير العضوية وحدها). ثم تستخدم هذه الطاقة لتوليد الترتيب داخل نفسها."

سؤالي هون: كيف ممكن الواحد يشوف السؤال وما يشوف الجواب بنفس السطر.. الصراحة حاولت كتير قول لحالي أنو بالغلط بس ما زبطت...

emosynthetic bacteria, from inorganic molecules alone). It then uses this energy to generate order within itself.

" الإجابة هي أن الخلية ليست نظامًا معزولًا: فهي تأخذ الطاقة من بيئتها في شكل طعام ، أو كفوتونات من الشمس (أو حتى، كما هو الحال في بعض البكتيريا المصنعة كيميائيًا، من الجزيئات غير العضوية وحدها). ثم تستخدم هذه الطاقة لتوليد الترتيب داخل نفسها."

سؤالي هون: كيف ممكن الواحد يشوف السؤال وما يشوف الجواب بنفس السطر.. الصراحة حاولت كتير قول لحالي أنو بالغلط بس ما زبطت...

بالختام:

- قد أفهم هيك حركات يعملوها ناس عاديين بهمهم يكذبوا النظرية بدون دليل بس مو دكاترة جامعة..

- قد أفهم شوف هالشي على مواقع إنترنت وفيسبوك ويوتيوب بس مو بكتاب جامعي..

- قد أفهم شوفها بكتاب كاتبو واحد وغلطان بس مو عشرة..

- قد افهم أنو تعتبروا نظرية التطور مشكوك فيها رغم ثباتها ورغم حججكم اللي بتسقط بثانية متل هي الحجة بس ما بفهم كيف بتعتبروا دورات التنمية البشرية والبرمجة اللغوية العصبية علم حقيقي وبتعملولها دورات بالمدرجات الجامعية متل هي:

هل يا ترى بترضوا ينعطى محاضرات بالتطور؟

للصراحة عندي شبه ثقة أنو هالحركة ا صارت عشوائيًا وقادر شم ريحة وزارة الأوقاف وأزلامها بكل كلمة من هالكلام المكتوب بس عتبي على الدكاترة اللي قبلوا يحولوا الكتاب الجامعي من مرجع علمي للطلاب إلى موجع للطلاب وللعلم.. يبدو دكاترتنا حضرانين أول محور بهي الدورة "كيف تفشل بنجاح".. وشكلو الجامعة لاحقتهم...

أحسنتم...