كيف تدمر نظرية التطور بطريقة بسيطة ودون أن تدخل المخبر حتى (تنبيه: العنوان ليس مزاح):

 

كُتبت في: 10/11/2020

أول مبارح بعد ما نزلت المقال حول القنيبي والتطور نطرت لليوم الصبح وما وصلني "المعلوم" من "منظمة دنتنخ" (منظمة دعم نظرية التطور ونشر الخرافة) وبما أنو هاد تالت مدري رابع پوست نزلو عن هالموضوع وما تقبضني قررت افضح المستخبي وسرّب أحد أهم أسرار هذه المنظمة (واللي بالرغم من أنو أي حدا دارس المفروض يكون بيعرفو إلا أن أعظم عظماء معارضي نظرية التطور ودكاترتهم وكبارهم الذين علموهم السحر ما بيعرفوه)، لذلك قلت لحالي أفضل انتقام من "منظمة دنتنخ" هوي أنو سربلهم ياه...

اسمع عزيزي يا من تهفو لليوم الذي ترى فيه أركان نظرية التطور تتضعضع وتتساقط متهاوية على رؤوس داعميها، الحل عندنا، وما عليك إلا نقله لمن تستمع لهم وهم يشرحون عن مئات وآلاف الأدلة الحقيقية التي تدل على خطأ النظرية بل ويخبرونك عن الكمية الهائلة من الأبحاث الملفقة التي تدعمها...

الحل ببساطة:

هنالك "اختراع" يبدو ولسببٍ ما أن عباقرة ودكاترة معارضي نظرية التطور لا يعرفونه وهو "المراجعة المنهجية Systematic Review" واللي بطريقة ما نجحت "منظمة دنتنخ" (منظمة دعم نظرية التطور ونشر الخرافة) أنها تخفيها عنهم بالرغم أنو شرحها وتعريفها وشروطها موجودة بكل شي يتعلق بالبحث العلمي من مجلات وجامعات ومعاهد ومنظمات علمية ومواقع موثوقة ولك حتى على الويكيبيديا.. بس على ما يبدو هالدنتنخ واصلة شو بدنا بالحكي لدرجة قدرت أنها تحجبها عنهم وتخليهم يبحو صوتهم ويضيعو وقتكم ساعات وأيام على النت...

هلأ لحاكيكم الصراحة، بعرف أنو أنتو آخر همكم العلم وإظهار الحقيقة وبعرف أنو مبسوطين بهالمجموعة اللي بتتسمع عليكم وآخر همكم مصلحتها وبعرف أنو همكم الأول والأخير هوي أنو هي المجموعة ما تشغل دماغها خوفًا من أنو تشك باللي عم تلقنوها ياه من آلاف السنين لدرجة أنو حتى أسماء برامجكم بتفضحكم متل (رحلة اليقين بدل رحلة الشك بحكم أنو الشك بخوفكم لأنو ما دام الواحد بلش يشك يعني بلش يشغل مخو) ولا هاد التاني صاحب برنامج ليطمئن قلبي (وعقلك معليش عمرو ما يتطمئن صفو على جنب مو وقتو خلينا نطمن قلبك الأول بحكم القلب "اصطلاحًا وهو خطأ قديم انتقل إلى الأديان أن القلب له علاقة بالمشاعر والاطمئنان وما إلى هنالك" سهل طمأنتو أما العقل "هالملعون" إذا بلش ينقح عالواحد مصيبة فبنشتغل بالمقصص لحتى نفضى للطيار).. بعرف كل هاد بس صدقوني بدي مصلحتكم ورح سربلكم السر اللي بس تعملوه بطمنوا عقل الكل وبتقضوا على مدعي نظرية التطور قضاءً مبرمًا...

القصة وما فيها أنو هي "المراجعة المنهجية Systematic Review" هيي عملية ما بتكلفك لا مخبر ولا حتى تطلع من بيتك والمتطلبات التقنية اللي بتحتاجها هيي أقل من أقل فيديو عم تعملوه... هيي ببساطة أنك تقعد على كرستك بغرفة من اختيارك ولو كانت عالسطح، قدامك كمبيوتر وكاسة هالقهوة أو الشاي وتبدأ بالعد التنازلي للقضاء على مدعي التطور.. وخلينا نبلش خطوة خطوة:

أول تسريب: "المراجعة المنهجية Systematic Review" كمنهج بحثي هي البحث بشكل منهجي عن أدلة البحث وتقييمها، بحيث تناسب هذه الأدلة معايير الأهلية المحددة (رح سربلكم هي المعايير لا تهكلو هم لأني ناوي دمر منظمة دنتنخ اليوم) ويتم إجراء هذه المراجعة لمعالجة سؤال بحث محدد وتهدف إلى تقليل التحيز باستخدام طرق واضحة ومنهجية. وينتج عن هذه المراجعة مقالة (ورقة بحثية) تسمى Systematic Review Article وهي دراسة بحثية أساسها تقييم دراسة للإجابة عن سؤال البحث نفسه وتحليله باستخدام خطة واضحة مدروسة في إستراتيجية البحث واختيار الدراسات، وتهدف هذه الخطة إلى التقليل من التحيز في النتائج؛ وذلك عن طريق البحث وعرض وتحليل عدة دراسات ذات صلة وتركيبها (عادة يفضل طرح كل الدراسات المرجعية والصحيحة ومن مختلف الآراء حول نقطة ما)..

يعني الموضوع بسيط متل مو شايفين ومع هيك رح ساعدكم أكتر.. تعالوا نفكر فيها سوا شوي:

- شو السؤال اللي بدنا نجاوب عنو: السؤال: لماذا نظرية التطور خرافة وكذبة وتضليل وكلام ملفق قام به العلمانيون والملاحدة والكفار والتافهين والحقيرين وغيرهم من الفئات الضالة؟

- شو منهجية البحث: منهجية علمية منطقية قائمة على أصول البحث العلمي والمنطقي وهي يخزي العين اللهم لا حسد عم تشرشر منكم شرشرة متل ما شفنا بالپوست الماضي (https://www.facebook.com/hasan.iessa/posts/3738845902846544) يعني لا خوف عليكم...

- دراسات وأبحاث علمية ومحكمة ومثبتة وأدلة صحيحة وموثوقة: وهي ما بينخاف عليكم فيها لأنو حسب ما لاحظت بكل حلقة أو مقطع عم تصرحوا أنو الأدلة العلمية عندكم بحر بتحسها عم تقتّل حالها مين لازم يقفز من على راس لسانكم بالأول يعني كمان لا خوف عليكم...

- مكان تنشرو فيه كمان معبى وموجود بحكم أنو أولًا في كتير شغلات أخطر من التطور انكتب عنها عادي وبحكم أنو مجلات النشر مو كلها تابعة لنفس الجهة والأهم أنو أنتو بتضلو تقولوا في دراسات علمية أثبتت كذب نظرية التطور معناها فيكم تنشروا بنفس المجلات هي...

لكملكم تسريب سر إسقاط نظرية التطور سمحولي نبهككم على كم شغلة من تبعوت الـNot-to-do:

- لا تجربوا تستخدموا كذبات علمية وتقويل للدراسات شغلات مو قايلتها.. عيب.. بتضحكوا الناس علينا وبتشمتوا جماعة منظمة دنتنخ، لأنو المجلة اللي رح تنشروا فيها لازم تكون مراجعة أقران Peer Review يعني في ناس مختصين يدققوا وراكم، هدول مو متل متابعينكم جايين مصدقينكم من الأول.. عيب ما بيصير...

- لا تجربوا تستخدموا مغالطات منطقية وقت نقاش الأدلة وبناء استنتاجات.. متل ما عملتو بالپوست الماضي.. كمان عيب هيك بتطلعونا بالخجلة وبتنرفض الدراسة...

- لا تحاولوا تخبوا دراسات وأدلة وتعملو تحيز توكيدي Confirmation bias وقت اختيار الدراسات... هي مراجعة منهجية يعني لازم تشمل كل الدراسات حول كل الآراء.. بيكشفوكم وبيضحكوا الأمم عليكم.. انتبهوا...

- لا تستخدموا ترجمات الخلقيين الغربيين لنصوص مجتزأة من دراسات.. لأنو أنتو هون لازم تقدموا مرجع لكل ادعاء أو كلمة بتكتبوها بالدراسة.. بعرف صعبة عليكم بس معلش جربوا...

- في نقطة كمان مهمة بس ماني عارف كيف وصلكم ياها.. بعرف رح تكون قاسية عليكم بس عذروني... تخيلوا أنو ولاد الذين ما بهمهم شو قال العالم فلان والدكتور علان والكاتب علاك البان.. لأنو حكي الأشخاص مهما كانت شهادتهم لا قيمة له دون دليل اعتمادًا على المغالطة الملعونة اللي اسمها Appeal to authority التوسل بالمرجعية...

- يا عيب الشوم منكم بس كمان في شغلة نسيت قلكم ياها وهيي أنو كتاب أصل الأنواع لداروين صار عمرو 161 سنة والدراسات والمراجع اللي لازم تناقشوها لازم تكون حديثة لأنو العلم عم يتطور للأسف والشغلات اللي بتزيد قيمتها ومصداقيتها كل ما قدمت هي بالدين مو بالعلم...

- آه صحي وفي فكرة كمان... الدراسات لازم تقدموها كروابط مشان الناس تشوفها يعني موضوع تحطوا دراسة وتقصوا منها وتشيلوا اسم مكان النشر وهيك شغلات ما رح تزبط هالمرة للأسف سامحوني...

هلأ هيك بعد ما سربتلكم السر، اجتمعوا حبيباتي وجيبوا القنيبي وهيثم طلعت ومن وراءهما من "الباحثون" المسلمون ولا تنسوا عدنان إبراهيم وكل الشباب الطيبة وسلخوا منظمة دنتنخ دراسة مراجعة منهجية من كعب الدست.. وبس تاخدوا نوبل (لأنو مضمونة صدقوني) لا تنسوا تعطوني حصتي مشان تعرف منظمة دنتنخ تتأخر عليّ بالدفع...

معًا لإسقاط كذبة التطور وكروية الأرض والجاذبية وهذه النظريات البالية...

آاااه صحيح.. كدت أن أنسى.. وأنتو عم تناقشوا الأدلة إياكم تكتبوا أنها مجرد نظرية لأنو هيك بيكشفوكم أنو ما بتفهموا شي، اقرؤوا هاد المقال مشان ما تغلطوا هيك غلطة وتخجلونا...

نوبل بالانتظار.. فوفروا على أنفسكم عناء الفيديوهات في الليل والنهار.. واسلخوها ورقة بحثية دون أن تجروا أي اختبار.. تكتب لكم العزّة ولنظرية التطور الانهيار.. 

............

الصورة للفت النظر:

وهي ليست بوكيمون حسب فهم القنيبي للتطور بل هي ذبابة العقرب Scorpionfly يعني مثال أفضل من مثال الأبوسوم الطيار الأسترالي والسنجاب الطائر الأمريكي وحتى شكلها لطيف كغلاف للدراسة اللي رح تضمنلكم النوبل.. أو لقلكم، لا تعذبوا حالكم فيها بحكم أنتوا بشر وأصلكم الأول والوحيد بشر أكبر من أنو تحطوا عقلكم بعقل ذبابة.. قال ذبابة قال...