حوار مع صديقي المؤمن بخلق الآيفون (الجزء الثاني)..

 

كُتبت في: 07/12/2020

في البداية وقبل أن تبدأ بقراءة هذا تأكد من أنك قرأت المقال السابق..

مبارح رجع رفيقي تبع الآيفون ما غيرو حكي معي عم يعاتبني كيف بنزل الحوار اللي دار بيني وبينو عالفيسبوك، وبعد عتاب دام عدة دقائق انتقل للسبب الرئيسي من اتصالو معي وهوي أنو يكمل نقاشو حول الموضوع، ودار بينا الحوار الآتي:

- صديقي: ليك حسن أنا صفنت بكلامك هاليومين وراجعت شوية كتب ومصادر وحابب كمل نقاشي معك..

- أنا: أوكي هاد من دواعي سروري بس قبل ما نكمل ممكن تخبرني شو هيي الكتب والمصادر اللي قرأتها؟

- صديقي: قرأت الهاندبوك اللي موجود مع الأيفون 11 پرو تبعي، وكمان قرأت الملخص اللي فيه عن الهاندبوكس السابقة اللي كانت مع نسخ الآيفون الأقدم.. وفي مقالات على النت كاتبينها شوية أشخاص من أنصار الآيفون حول هي المواضيع وإذا بدك بعطيك ياهم تقرأهم...

- أنا: أيوا، طيب سمحلي أسألك، أنت ليش اخترت الآيفون 11 پرو مو الأيفون X مثلًا، وهل أنت مقتنع تمامًا بالكلام تبع أنصار الآيفون X اللي بقولوا أنا ما رح يجي بعد الآيفون تبعهم أي آيفون أفضل لحتى عم تستشهد فيهم؟

- صديقي: بابا وماما بحبو الآيفون 11 پرو وجربوه وجابولي ياه هدية وقالولي أنو أفضل آيفون نزل أو رح ينزل وأنا بوثق بكلامهم، ومشان بقية الآيفونات لا طبعًا كلامهم مو صحيح وأنا متل ما خبرتك قرأت كلامهم حسب مو مكتوب بالهاندبوك تبع الآيفون 11 پرو تبعي...

- أنا: طيب إذا مو صحيح ليش عم تستشهد فيهم وعم تذكرلي ياهم كمصادر؟

- صديقي: في شغلات مشتركة صحيحة متل أنو الآيفون أحسن موبايل وأنو اللي صمم الآيفون هوي المصمم الأعظم بين جميع المصممين بس في حكي غلط ضافوه بعد ما نزل الآيفون 11 پرو مشان ما تنزل مبيعاتهم ويحافظوا ع سوقهم، وبكل الأحوال ما جاء في هاندبوكهم يوافق هاندبوكي أخذته وما جاء مخالفًا له تركته..

- أنا: أيوا، يعني أنت قرأت الهاندبوك تبع الآيفون اللي جبلك ياه أبوك وأمك هدية واللي ويا للصدفة الحسنة لو ولدان بعيلة عندها آيفون X لكنت من أنصار الـX مشان أهلك، وكمان عم تستشهد بهاندبوكس باقي الآيفونات وبشكل انتقائي، وبمقالات كاتبينها أنصار الآيفون.. شي حلو.. طيب جربت تقرأ شي تكنولوجي حيادي وموثق وبينظر للموبايلات كلها نظرة تكنولوجية حيادية؟ وبناقش الآيفونات والسامسونغ والهواوي وغيرو من منطلق تكنولوجي واحد؟

- صديقي: طبعًا لا، أساسًا كل هدول الباحثين التكنولوجيين مأجورين وهمهم الوحيد إثبات أنو الآيفون 11 پرو مو هو الآيفون الأسمى، وأنو الهاندبوك تبعو غلط...

- أنا: غريب.. مع أنو في منهم كتير من أنصار إصدارات مختلفة من الآيفون، وغير هيك أنتو بتضلوا تستشهدوا بكلامهم لما يكون بناسبكم...

- صديقي: هلأ ليش كتر اللعي.. حابب تتناقش أو لا؟

- أنا: ما أنا عم أتناقش شو شايفني عم أتسلى؟

- صديقي: سؤالي ألك.. أنا رح إجي معك، جدلًا هاه، لا تفكر إني موافقك لكن جدلًا، أنو كل الآيفونات متل بعض وأنو في سجل أحفوري وبيولوجي وكل هالحكي وأنو تطوروت صفاتهم مع الوقت، بس في تلات نقاط حابب ناقش فيهم وهني مين قلك أنو الآيفون متطور عن السامسونغ و...

- أنا (مقاطعًا): للمرة الألف يا عزيزي.. في بينو وبين السامسونغ سلف مشترك وليس متطور عن السامسونغ!

- صديقي: إي إي متل ما بدك.. التلات نقاط هني مين قلك أنو الآيفون والسامسونغ وباقي الموبلات والكائنات التكنولوجية في بينهم سلف مشترك..  ومين هوي المصمم الأول لكل هدول.. وشو ماهية الروح الموجودة بالآيفون؟

- أنا (وقد فنجرت عيوني): لا على ما يبدو نهارنا طويل... طيب خليني أبدأ من الأقصر جوابًا.. موضوع السلف المشترك مع السامسونغ وباقي الموبايلات والكائنات التكنولوجية انلعى قلبي وأنا أشرحلك ياه المرة الماضية وأظن الكلام مسجل وموجود بالرابط بالتعليق الأول.. وعفكرة في تطبيقات تكنولوجية لا محدودة تعتمد على هالشي لإصلاح الأعطال اللي بتصيب الآيفون وكتير أحيان في قطع من الآيفون بتتعطل وبتم استبدالها بقطع من الموبايلات التانية لأنو في كتير خصائص تكنولوجية حافظت عليها كل الموبايلات أثناء التطور بسبب التطور المتوازي اللي حكيتلك عنو سابقًا...

- صديقي (وبنظرة الحربوق مرة أخرى): طيب هدول الموبايلات كلها مين صممها؟

- أنا: عزيزي هي الموبايلات وغيرها من كائنات تكنولوجية تطورت ببيئاتها بسبب الشروط المحيطة فيها واللي مع تطور هي الشروط كان لابد لهي الكائنات التكنولوجية إما إنها تتطور أو تنقرض... على سبيل المثال، قديمًا كان في نوع من الكائنات الضخمة اللي غازية السوق كلو ومنتشرة وبتشوفها في كل مكان وما فيه حدا ينافسها والإقبال عليها شديد.. صار تغيرات ببيئة السوق وبلشت تظهر أنواع تانية، وهي الكائنات الضخمة أصرّت أنو ما تتطور بحجة أنو لا يمكن شي يأثر عليها لأنها ملكة السوق والمنطقة؛ لكن صار هطولات نيزكية من رفض المشترين لكل شي ضخم وغير متطور كفاية سببت انقراض هي الكائنات ونجاة الكائنات الناعمة الصغيرة تبع شاشات اللمس، وما ضل من هي الكائنات المنقرضة غير هياكلها تشهد على أنو البقاء للأصلح والأنسب للسوق وليس للأكبر أو الأكثر عددًا...

- صديقي: عم مين عم تحكي أنت؟ مين اللي انقرض؟

- أنا: النوكيا يا عزيزي.. ما بتسمع بالنوكيا؟

- صديقي: النوكياااا أيوااا... وشو مشان المصمم الواحد؟

- أنا: الأدلة بتدل أنو ما في مصمم واحد صمم هي الموبايلات بل كتييير عوامل سببت تغير كل قطعة فيها.. وفي كتير قطع مشتركة بينها إما جاي من بيئة تصنيع وحدة عطت أكتر من نوع وفق التطور المتوازي متل أنو ممكن البطاريات تبع أنواع مختلفة من الموبايلات تكون تصنيع شركة وحدة توزع للكل، أو لأنها تطورت ببيئات تصنيع مختلفة لكن لتناسب طلبات السوق نفسها غطت مواصفات متشابهة وهاد التطور المتقارب متل أنو الكل طور شاشة لمس بنفس المواصفات تقريبًا وهاد حكيتلك عنو المرة الماضية...

- صديقي: يعني بدك تقلي أنو الآيفون مو كلو إجا قطعة وحدة وألو مصمم واحد صممو هيك من الأول لغرض واحد؟

- أنا: لا طبعًا.. إذا بتفك قطع الآيفون بتقدر ببساطة من الكود التكنولوجي للقطع تعرف كل قطعة من وين مصدرها وشو القطع اللي بتشبهها أو بتماثلها بغير موبايلات.. وعفكرة في كتير عيوب تصنيعية بالآيفونات غير موجودة بباقي الموبايلات بسبب أنو الظروف اللي كانت السبب في تشكلها صارت بشكل منفصل، يعني ف يكتير موبايلات أنت بتعتبرها أسوأ من الآيفون شاشتها أدق وكاميرتها أفضل وأقل أعطاب.. حتى في صفات وقطع بالآيفونات ما ألها لازمة حاليًا بس الآيفون حافظ عليها من إصدارات سابقة كان وقتها ألها أهمية.. أنت من وين جايب فكرة المصمم الواحد؟ مين قلك عنها؟

- صديقي: مكتوبة بالهاندبوك تبع الآيفون 11 پرو تبعي..

- أنا: هاد اللي هداك ياه أبوك وأمك..

- صديقي: إي.. ومكتوب بالحرف أنو الآيفون تصنيع شركة آپل وأنو فخر الموبايلات وكمان أنو الآيفون 11 پرو هو آخر وأحدث وأحسن نسخة نزلت من الآيفونات.. وآپل كلامهم كلو صحيح!

- أنا: ودليلك على أنو كلامهم كلو صحيح؟

- صديقي: الهاندبوك تبعهم.. ليش مخك صاير سميك اليوم!

- أنا: ودليلك أنو الهاندبوك تبعهم صحيح؟

- صديقي: هني كاتبين فيه أنو صحيح..

- أنا: انطر لحظة خليني استوعب لأنو يبدو فعلًا مخي صاير سمبك اليوم.. دليلك على أنو اللي صمم الآيفون هو آپل هو كلام آپل ودليلك أنو كلام آپل صحيح هو الهاندبوك تبعهم اللي هوي كلامهم ودليلك أنو الهاندبوك تبعهم صحيح هو أنهم قالوا أنو صحيح.. يعني دليلك على صحة كلامهم هو كلامهم نفسو! بتسمع بالدليل الدائري يا غالي؟

- صديقي: لا بسمع بالدليل المثلث.. بلا سخافتك هلأ.. أنت اطلعت على الهاندبوك شي؟ اطلع عليه وشوف كمية الكلام التكنولوجي والرقمي اللي فيه...

- أنا: أول شي أنا مطلع عليه أكتر منك صدقني.. تانيًا.. وجود أي كلام صحيح في أي هاندبوك لا يجعله صحيح بالضرورة ولكن وجود عبارة واحدة خطأ تكفي لقولنا أنه غير دقيق لكن هاد مو موضوعنا هلأ.. كنا عم نحكي بمصمم الموبايلات... عزيزي متل ما قلتلك كل موبايل تشكل من مصممين كتار وتحت تأثير عوامل كتيرة أثرت على كتير موبايلات وكائنات تكنولوجية...

- صديقي: طيب كيف نشأت التكنولوجيا أول مرة عالأرض ومين أول مين عملها وليش وكيف عملها.. شو تفسير نظرية التطور التكنولوجية لنشوء التكنولوجيا على الأرض؟

- أنا: عزيزي، نظرية التطور التكنولوجي هي نظرية عن أصل الأنواع التكنولوجية وتنوعها وتطورها وما ألها علاقة بنشوء التكنولوجيا على الأرض، هي شي وهي شي مختلف تمامَا! نشوء التكنولوجيا على الأرض في عليه طروحات تكنولوجية كتير فيك تقرأ عنها...

- صديقي: ما بدي أقرأ أنت قلي شو النظرية اللي بتثبتها وكيف فينا ننشأ حياة تكنولوجية جديدة عالأرض؟

- أنا: الموضوع مو بهالبساطة وما فينا نقول أنو الجواب تبلور لحتى يصير نظرية بقوة نظرية التطور مثلًا...

- صديقي: يعني ما في جواب حاسم؟

- أنا: لا، بس في باحثين تكنولوجيين بينوا أنو....

- صديقي (مقاطعًا): خلص ما عندك جواب يعني في مصمم أول.. هاد اللي بدي أوصلو!

- أنا: يعني إذا ما عندي جواب معناها في مصمم أول؟

- صديقي: طبعًا...

- أنا: وشو مواصفاتو؟

- صديقي: مواصفاتو مكتوبة بالتفصيل بالهاندبوك تبع الآيفون 11 پرو...

- أنا: طيب ليش ما يكون هوي المصمم اللي مكتوبة مواصفاتو بالهاندبوك تبع الآيفون X أو تبع الآيفون 3G أو واحد تالت مو معروف لسه.. كيف حسمت أنو اللي مكتوبة مواصفاتو عندك؟

- صديقي: عالأقل عندي جواب مو متلك ما بتعرف...

- أنا: عبارة "ما بعرف" هي جواب علمي دقيق جدًا أدق بدشليار مرة من إعطاء جواب لا دليل عليه بناءً على عدم معرفة الآخر للجواب لأنو هي مغالطة التوسل بالمجهول...

- صديقي: طيب أثبتلي أنو مو هوي المصمم...

- أنا: هي مو شغلتي صديقي لأنو ببساطة عبء الإثبات عليك.. يا أما ببساطة أنا فيي قلك أنو المصمم هو الحرنتكوش الذهبي...

- صديقي: وشو هاد الحرنتكوش الذهبي؟

- أنا: مصمم تكنولوجي يسكن في مجرة أندروميدا كان يؤمن به أنصار الآيفون i700.. وإذا مو مصدق أثبتلي أنو مو موجود!

- صديقي: يعني شو هلأ؟

- أنا: غالي لنفترض أنه يوجد مصمم واحد للآيفون فهل هو بالضرورة نفس مصمم السامسونغ أو التيليفون بو قرص أو الغسالة أو المايكرويف؟ طبعا لا إذا المصمم هو البيئة الخاصة بكل واحد منها بعواملها المختلفة من مصممين وطلبات زبائن ومواد متوفرة وأسعار وغيرها. وإذا كان هنالك مصمم أول لهذه البيئات فهل هو بالضرورة هاد المصمم يكون مصمم واحد عاقل صمم هي البيئات كلها بهدف تصنيع الآيفون؟ وإذا فرضنا جدلًا وجود مصمم واحد لكل هذه البيئات فهل صفات هذا المصمم هي كما مذكور في الهاندبوك تبع الآيفون 11 پرو أو تبع الآيفون X أو تبع الآيفون 3G؟ وإذا رجعنا لسه لورا اكتر وقلنا للآيفون مصمم هو البيئة وللبيئة مصمم هو كذا وضلينا نرجع اعتمادًا على الفرضية السببية إذا من مصمم هذا المصمم؟ وإذا قلتلي هاد المصمم الأول لا مصمم له إذا لماذا أعطيته صفات على أنو مصمم عاقل بمواصفات محددة هدفو معروف ومحدد ورح يعمل ويساوي..

اعلم صديقي أنه إذا كان بينك وبين إثبات وجود مصمم أول متر، فبينك وبين إثبات أن هذا المصمم الأول قوة عاقلة لها هدف من هذا التصميم كيلومتر، وبينك وبين إثبات أن هذه القوة تتواصل مع الآيفونات 1000 كيلو متر، وبينك وبين إثبات أن هذه القوة هي القوة المذكورة في الهاندبوك تبع الآيفون 11 پرو أو تبع الآيفون X أو تبع الآيفون 3G مليون سنة ضوئية!

- صديقي: طيب ليش نحنا ما فينا نصمم آيفون وما فينا نحط فيه روح؟

- أنا: أيواااا تعال أحكيلك عن روح الآيفون.. ما تسميه روح يا عزيزي....

(يقاطعنا صوت أبوه لصديقي يصرخ فيه أنو حاجة لعي على آيفونك الـ11 پرو اللي اشترالو ياه، وأنو الفاتورة عم تطلع كبيرة)..

- صديقي: ليك حسن آسف، ممكن تأجلي الحكي عن روح الآيفون للاتصال التالت...

- أنا: إي طبعًا وسلملي عالوالد وقلو مبارك ما جبت...

- صديقي: أحسن منك عالأقل ما جاب حدا مفكر أصلو سامسونغ غالاكسي...

- أنا: لك شو صرلك.. قصدت مبارك ما جاب عن الآيفون 11 پرو مو عنك أنت.. بكل الأحوال شكرًا ألك..