الداء الأخطر والطفيلي الأكثر فتكًا على وجه الأرض..

Photo credit: @melanippe_art https://www.picuki.com/media/2214049400694450265

كُتبت في: 06/01/2020

إحدى أدلة التطور هوي اختلاف المكونات النباتية والحيوانية (الفلورا والفونا) في المناطق الجغرافية المعزولة مقارنة بتشابهها في المناطق الجغرافية المفتوحة على بعضها والسبب هوي اختلاف المسارات التطورية المتقدمة للأحياء باختلاف الظروف البيئية المحيطة بالرغم من تشابه بداياتها (الأسلاف الأولى) لأنو كانت اليابسة رقعة واحدة قبل ما يصير انقسامات قاريّة..

وأستراليا تميزت عن غيرها أنها ضلت معزولة عن باقي بقاع الأرض لأكتر من 100 مليون سنة لهيك 85 بالمية من النباتات اللي فيها و84 بالمية من الثديات و45 من الطيور هي كائنات حية أسترالية الأصل ونسبة كبيرة منها لا تستوطن (طبيعيًا) أي مكان آخر غير أستراليا؛ لذلك بأستراليا رح تلاقي كتير حيوانات وطيور وحشرات ونباتات غير موجودة بأي مكان تاني..

أغلب الحيوانات بتكون عادةً متأقلمة ببيئتها وعايشة فيها ضمن علاقة (تعايش) بتقدم للبيئة وبتاخد منها بما يضمن استمرارها واستمرار البيئة اللي هيي فيها، والبعض بكون عايش علاقة (تطفل) على كائنات تانية بياخد منها بدون ما يعطيها لكن بشكل عام ومن منظور الكوكب فهيي علاقة تعايش مع البيئة اللي هوي فيها..

ما عدا حيوان واحد هوي الإنسان، اللي بسبب قدراتو قدر ياخد علاقة التطفل لمستوى آخر وهوي التطفل على الكوكب بحد ذاتو واللي كمان بسبب قدراتو قدر ينقل هالتطفل لجميع البيئات وما يتركو محدود ببيئة وحدة أو منطقة جغرافية وحدة...

ومن البيئات اللي عانت من تطفل الإنسان كانت أستراليا، ومو بطريقة وحدة بل بعدة طرق..

أول طريقة لما الإنسان الحديث (ما يسمى المتحضر) انتقل لأستراليا وأنشأ مستعمرات هونيك وقتل كمية هائلة ومخيفة مما يسمى الحيوانات الداجنة مشان تغذية وبناء المستعمرات..

تاني طريقة التغيير الغبي وغير المدروس والتلاعب بالتنوع الحيوي عبر النقل المقصود أو غير المقصود للكائنات الحية اللي ما عندها عدو طبيعي يحدّ من انتشارها متل ما صار مع الأرانب الأوروبية البرية اللي قام شخص إنكليزي غني غبي اسمو Thomas Austin بنقل 13 أرنب أوروبي بري من إنكلترا وتحريرهم باستراليا عام 1859 مشان يتسلى ويمارس "هوايتو" ويصيدهم، نجى منهم كم واحد وبسبب توافر الأكل والمخابئ وغياب مفترس طبيعي صاروا آلاف لدرجة أنو بحلول عام 1866 الصيادين صادوا 14000 أرنب وضل كتير أكلو الأخضر واليابس، وهاد مثال ضمن كتير أمثلة..

تالت طريقة التغير المناخي اللي لحد الآن العالم والدول ورؤساء الدول بتنكرو وما بتعترف فيه، وهاد سمعتوا عنو كتير أكيد وما في داعي نضل نعيد ونزيد فيه..

رابع طريقة وأخطر طريقة هيي عدم تحمل الإنسان لأخطاؤو يعني حرائق استراليا كل يوم عم تزيد ووصلت لـ12 مليون فدان وحرقت حوالي 480 مليون حيوان من أندر الحيوانات وفي أنواع كاملة رح تنقرض وقبلها الأمازون وغيرها وما عذبوا حالهم وعملوا لجنة عالمية لمكافحة الحرائق ولا لاقوا طريثة عملية لردعها وكأنوا ما حدا ألو علاقة بالتاني..

بهيك حالات ما بتذكر غير قول Agent Smith لـ Morpheus بفيلم The Matrix:

“I'd like to share a revelation that I've had during my time here. It came to me when I tried to classify your species and I realized that you're not actually mammals. Every mammal on this planet instinctively develops a natural equilibrium with the surrounding environment but you humans do not. You move to an area and you multiply and multiply until every natural resource is consumed and the only way you can survive is to spread to another area. There is another organism on this planet that follows the same pattern. Do you know what it is? A virus. Human beings are a disease, a cancer of this planet. You're a plague and we are the cure.”