ما بين الأديداس والأبيباس ، والأبراج وعلم الفلك ، والغراف أناليسز والغرافو أناليسز..

 

كٌتبت في: 12/08/2019

أي مواطن سوري أو عربي أو صيني أو أي دولة حيث حقوق الملكية غير مضمونة أو محفوظة بيعرف أسماء ماركات ثياب وأحذية وحتى إلكترونيات وأجهزة تقنية غريبة عجيبة مشتقة كاسم وكتير أحيان كلوغو من ماركة مشهورة متل مثلًا أديداس عملو منها أكتر من عشر ماركات مضروبة متل أديماس وأبيباس وأداداس وغيرها وكمان بوما ونايكي وآپل وكتير غيرها من الماركات..

هاد النوع من تزوير الماركات Brand Faking اسمو قرصنة العلامات التجارية Brand Piracy وتعرف بأنها عملية تسمية منتج ما بطريقة ما قد تؤدي إلى التشويش مع علامات تجارية معروفة أخرى. يعني هيي الاستخدام غير المصرح به لأسماء العلامات التجارية أو اللوغو أو التصاميم أو الوصف. ويتم هاد الشي أحيانًا مع تغييرات طفيفة بالاسم أو الشعار لا يتم الانتباه ما لم يتم التدقيق وهاد الشي بسبب خسارة كبيرة للشركات الأصلية صاحبة العلامة لأنها بتسبب خسارة في الإيرادات وبصورة العلامة التجارية وبسمعة المنتجات.

طيب شو دخل هالشي بالعلم؟

للأسف حتى بالعلم في قرصنة علامات وأسماء، وهيي أنو يتم تسمية بعض العلوم الزائفة بمسميات توحي أنها علم بالرغم من أنها ليست كذلك وقد يكون هذا عن قصد أو عن غير قصد.. مثلًا:

بعض العلوم الزائفة قد تكون من الجقارة وبجاحة العين بمكان لدرجة سرقة اسم علم آخر بشكل كامل متل علوم الطاقة، متل ما كلنا بنعرف في علم أصيل اسمو علم الطاقة ألو علاقة بأنواع الطاقة المختلفة من ساكنة وحركية وحرارية وإلخ وألو قوانين وقواعد وتحكمه قوانين الترموديناميك وغيرها وعليه مئات آلاف الدراسات وهاد ما ألو علاقة أبدًا أبدًا أبدًا وكمان أبدًا بعلم الطاقة الزائف تبع التحكم بالطاقة الحيوية والعالمية والكونية والتشاكرا والريكي وهالسخافات. كتار بيخلطوا بيناتهم لذلك يرجى الحذر، وأنا نزلت كتير پوستات عنو ما في داعي لإعادة الحكي..

بعض العلوم الزائفة بتستخدم أسماء مركبة مشان توحي أنها علوم حقيقية متل البرمجة اللغوي العصبية neuro linguistic programming. في علم حقيقي للأعصاب اسمو علم الأعصاب Neuroscience بيدرس الجهاز العصبي وفي علم اللغويات Linguistics بيدرس اللغات وأصولها ومقارنتها وفي علوم البرمجة اللي هيي من علوم الكمبيوتر بس هاد الخليط العجيب الغريب البرمجة اللغوي العصبية فهاد علم زائف، كمان نزلت كتير پوستات عنو ما في داعي لإعادة الحكي..

بعض العلوم الزائفة شو بتعمل؟ بتغير حرف من اسم العلم ومثال على هاد الشي ما يسمى "علم" قراءة أو تحليل الخطوط graphology وهوي علم زائف يدعي تحليل الشخصية من خلال الصفات الفيزيائية لخط اليد من شكل وحجم وغيرو للكشف عن الحالة النفسية لكاتب النص وقت كتابته له أو حتى لتقييم صفاته الشخصية. ويسمى هاد العلم الزائف ايضا graphoanalysis وهي مختلفة عن graphanalysis اللي هيي علم تحليل الخطوط لمعرفة كاتبها متل تحليل تزوير الخطوط والمستندات يعني تحليل الخط وعمرو ومين كاتبو ونوعو إلخ لتحديد إما الكاتب أو الحقبة التاريخية أو مقارنة الخطوط لكشف التزوير ولا علاقة ألها بتحليل الشخصية. ولاحظوا هون الفرق بين graphanalysis و graphoanalysisالفرق هوي حرف O اللي عمل لخبطة بين العلم الحقيقي graphanalysis والزائف graphoanalysis. طبعًا في دراسات بينت أنو graphology زائف متل دراسة meta-analysis شملت 400 دراسة بينت عدم وجود رابط بين الخطوط المتشابهة بالشكل وتشابه شخصيات أصحابها (مصدر1). وفي دراسة كمان بينت عدم قدرة عالعلم الزائف على تحقيق اي نتيجة على مؤشر مايرز بريغز للأنماط تبع تصنيف الشخصيات (مصدر2). 

وفي بعض العلوم الزائفة بتحاول تتسلل للعلوم الحقيقية متل التنجيم أو ما يسمى "علم" الأبراج Astrology واللي بيدعي أنو مواليد الإنسان مرتبطة بشكل من أشكال التجمعات النجمية المرئية المرتبطة بمسار الأرض حول الشمس خلال السنة اللي بتأثر على شخصيتو وتصرفاتو وحتى أحداث حياتو كل عمرو وطبعًا هاد كلام فاضي لا علاقة له بالعلم، ويتم الخلط بينو وبين علم الفلك Astronomy وبتلاقي الدجال تبع الأبراج بيسمي حالو "عالم فلك" وبيسمو التنجيم "علم فلك"، مع أنو علم الفلك هوي علم دراسة الأجرام السماوية متل الكواكب والنجوم والنيازك وغيرها وفي كمان علم الكونيات Cosmology اللي بيدرس الكون وعلومو وتطورو ونشأتو وهيك شغلات. يعني الخلط عم يصير سواء بالعربي "علم الأبراج والفلك" الزائف مع علم الفلك الحقيقي وبين Astrology الزائف وAstronomy الحقيقي.. طبعًا في كتير ادعاءات أنو الأبراج بتأثر عالإنسان متل ما القمر بأثر عالمد والجذر وهي أكتر ادعاء مسخرة ممكن تسمعو بحياتك لأنك ببساطة عم تاخد تأثير جرم سماوي متل القمر حجمو ربع حجم الأرض ويدور في مدارها على ماء المحيط اللي مساحتو 70% من مساحة الأرض وتقارنو مع تأثير هيك جرم على شيء ذو حجم مهمل متل الإنسان بالنسبة للقمر أو الأرض، وعم تاخد قوانين فيزيائية متعلقة بالمسافة والحجم والمدرات والجذب وغيرها وعم تقارنها بشي لا يسمى قانون ألو علاقة بمواليد الأشخاص.. باختصار لا يوجد أي دليل علمي واحد يثبت أنو الأبراج حقيقة ولا بأي شكل من الأشكال ولكن يوجد العديد من الدراسات تثبت أنها زائفة متل دراسة  ميتا أناليسز ل40 دراسة ضمت 700 منجم وأكثر من 1000 مخطط ولادة. تضمنت عشرة من الاختبارات شارك فيها 300 شخص، طلب من المنجمين اختيار التفسير الصحيح لمخطط ولادة موجود ضمن عدة مخططات أخرى غير صحيحة حسب التنجيم، ووجدت الدراسة أنو لما تمت إزالة التاريخ والدلائل الواضحة الأخرى، لم تكن نتائج الاختبارات الصحيحة ذات نسبة مهمة احصائيًا ولا تتعدى نسبة الاختيار عن طريق الصدفة (مصدر3). وفي 10 دراسات تانية، اختار المشاركين الأبراج التي شعروا أنها أوصاف دقيقة للأشخاص. كما هالمرة، ما كانت النتائج أفضل من الصدفة (مصدر4). وكمان درس عالم الاجتماع الكمي David Voas من جامعة مانشستر بيانات لأكثر من 20 مليون شخص في إنكلترا وويلز لمعرفة ما إذا كانت الأبراج تتوافق مع ترتيبات الزواج لكن لم يلاحظ أي تأثير (مصدر5). 

طبعًا بعض الأحيان بيصير خلط عن غير قصد بين مسميات علوم زائفة ومسميات علوم حقيقية وبكون هاد الخلط ناجم عن قلة الاطلاع متل لما بصير خلط بين ما يسمى التنمية البشرية وما بين الموارد البشرية فبينما الموارد البشرية human resources هيي طريقة إدارة الموارد البشرية (القوى العاملة) ضمن عمل ما أو منظمة ما أو مكان ما، فالتنمية البشرية تبع تطوير طاقات الإنسان وإمكانياتو بالحكي الفاضي اللي ما ألو طعمة هيي شيء لا مكان له من الإعراب ضمن العلوم..

يعني باختصار أنت اللي عم تصدق أو تدفع لكورسات العلوم الزائفة متلك متل اللي عم يشتري بوط أبيباس بسعر بوط أديداس، يعني هاد الحرامي اللي عم يبيعك عم ياخد منك تكلفة بوط أديداس وعم يعطيك جودة بوط أبيباس.. يعني عم تسمحلو يسرقك وكمان يضحك عليك، صدقني مو حلوة بحقك..

المصادر:

1. https://www.hbs.edu/faculty/Pages/item.aspx?num=7387

2. ‏Bayne, R., & O'Neill, F. (1988), "Handwriting and personality: A test of some expert graphologists' judgments", Guidance and Assessment Review (4): 1–3.

3. Dean G.; Kelly, I. W. (2003). "Is Astrology Relevant to Consciousness and Psi?". Journal of Consciousness Studies. 10 (6–7): 175–198. https://www.semanticscholar.org/paper/Is-astrology-relevant-to-consciousness-and-psi-Dean-Kelly/2bb2d5658e1eff0f151a41a25b02b3b5027673b8

4. Pigliucci, Massimo (2010). Nonsense on stilts : how to tell science from bunk ([Online-Ausg.]. ed.). Chicago: University of Chicago Press. ISBN 9780226667850. https://link.springer.com/article/10.1007/s11191-011-9359-y

5. https://www.manchester.ac.uk/discover/news/love-not-in-the-stars/