ما بين العلم الشعبي و”العلم” الشعبوي، كما بين الفلسفة والتفلسف!

كُتبت في: 27/04/2020

كتار علقولي على الپوست اللي نزلتو عن حلقة الصيام تبع الدحيح أنو يا أخي ليش عم تدقق عليه هالقد ما هاد پوپيولار ساينس Popular science وكأنه يحق للپوپيولار ساينس ما لا يحق لغيره.. للأسف لاحظت أنو في جهل كبير حول معنى الپوپيولار ساينس.. لذلك تحملوني بهاد الپوست...

العلم الشعبي أو الپوپيولار ساينس Popular science هو أسلوب يستخدم لتفسير العلوم وشرحها بطريقة مبسطة تستهدف الجمهور العام، وليس الاختصاصيين كالعلماء أو الاختصاصيين أو الطلاب الآخرين. يعني بينما تركز المجلات والمؤسسات العلمية على التطورات العلمية الأخيرة وتقديمها بشكل كامل ودقيق مدعم بكل التفاصيل والأدلة والمزودة بمراجع علمية، العلوم الشعبية عادة بقدمها علماء أو صحفيين أو أشخاص مهتمين لازم يكون عندهم الحد الأدنى من فهم أساسيات العلم بشكل عام وأساسيات الموضوع اللي عم ينحكى فيه وبيتم عادة تقديمها بأشكال كتيرة متل الكتب والأفلام الوثائقية التلفزيونية ومقالات المجلات وصفحات الويب.

صحيح أنو العلم الشعبي لا يعد مصدر علمي أو مرجع معتمد ولكن هاد لا يعني أنو فيه يخالف شروط المنهجية العلمية والدقة الأكاديمية أو ارتكاب أخطاء ومغالطات علمية ومنطقية لأنها بهي الحالة لم يعد نوع من أنواع العلم ولا يحق له حمل كلمة "علم" في اسمه أو الاستقادة من مصداقيته.. 

بينما "العلم" الشعبوي أو اللي رح نسميه Populist "science" (وهاد مو علم طبعًا بس استخدمت كلمة علم معو متل استخدامها مع "العلم" الزائف) هوي استخدام الأسلوب العلمي ومحاولة استخدام عبائته لتمرير أمور شعبوية، والشعوبية Populism هيي أسلوب سياسي اجتماعي يعتمد على جذب العامة عبر اللعب على العواطف وتسميعهم اللي بحبوه بأسلوب ديماغوجي لتمرير إيديولوجية معينة...

طيب كيف لازم يكون المحتوى المقدم بأسلوب العلم الشعبي أو الپوپيولار ساينس Popular science؟

بتلخص مجلة Nature مواصفات المواد المقدمة على طريقة العلم الشعبي بالآتي:

- "تتطلب جهد مضني ووقت طويل لتحضيرها": وهاد طبيعي لأنو تبسيط العلم لغير المختصين دون التأثير بشكل سلبي على صحتو وقيمتو العلمية أو تحويرو عن معناه ليس بالأمر السهل أبدًا وهوي خطأ يقع فيه كتار من مقدمي العلم الشعبي (حلقة الدحيح عن الصيام مثالًا ومقالي حولها للتحذير من هيك انحراف ممكن يحول شغل الدحيح من علم شعبي لـ"علم" شعبوي)..

- "المادة المقدمة يجب أن تكون غير محدودة ولا يجب أن تكون غير دقيقة": يعني المحتوى ما بيصير يكون خاطئ وغير دقيق بحجة أنو مقدم للعامة مو بالضرورة يكون كتير تخصصي وفيه معادلات وقوانين وتعاريف وشغلات صعبة.. يعني مبسط لكن دقيق وصحيح علميًا.. وبما أنو علم فهوي أكيد يتبع المنهجية العلمية والأكاديمية..

- "يجب أن تكون المادة جذابة ولكن لا يجب أن تكون مثيرة للعواطف": يعني لازم اللي عم يقدم المادة يراعي أنها تكون جذابة مشان جذب أكبر شريحة من الناس لأنو أشخاص غير مختصين لازم تقدملهم المحتوى بشكل جذاب مشان يشاهدوه سواء بطريقة العرض أو المحتوى أو أسلوب المقدم، ولكن ما بيصير تكون بتعتمد على اللعب على العواطف والعصبيات وتسمع العالم اللي بتحب تسمعوا مشان تجذب شريحة ما (يعني هون بتحس أنو الكلام حرفيًا مطبق على الخطأ اللي تم ارتكابو بحلقة الصيام واللي شخص أسلوبو مميز متل الدحيح ما كان مضطر يتبعو)..

- " فخم وذو مستوى ولكن ليس للنخبة": يعني كونوا پوپيولار ساينس ما بيعني يكون كيف ما كان بل لازم يكون فخم علميًا وغني المحتوى بس مو موجه للنخبة الاختصاصية بل مبسط للعامة كأسلوب وليس كمحتوى..

- "لا يجب أن يكون مقدم باللغة العلمية الصرفة بل باللغة المحكية اليومية": أظن هي واضحة..

- "يجب أن تقدم محتوى مميز وذو إضافة إيجابية وتبتعد عن الأمور المملة": كمان هي واضحة..

أظن صار واضح سبب اعتراضي على حلقة الصيام واللي هيي محاولة تنبيه برنامج متل الدحيح ناجح ومؤثر وألو قاعدة شعبية كبيرة ينحدر من مستوى العلم الشعبي أو الپوپيولار ساينس Popular science إلى مستوى "العلم" الشعبوي Populist "Science" والتحول (وآسف على قول هذا) من "الدحيح" إلى الـ"الهبيد" لإرضاء فئات واضح من التعليقات أنو ما نجح بإرضائها حتى...

في النهاية مثال على الفرق بين العلم الشعبي والشعبوي:

لما واحد بتصيبو حمى وبتجي ستو (التيتة، جدتو، نينتو، نانتو، حبابتو.. إلخ) بتقلو تعال صبلك رصاصة أو حطلك خرزة زرقا أو حجاب أو خلي حدا يقرأ عليك، هون عنا عدة خيارات:

- إذا وافقتها: فأنت جاهل وما ألك علاقة بالعلم وهون تصطفل بحالك...

- إذا بتعرف أنها غلط وحبيت تشرحلها وقلتلها: الحمى رد فعل التهابي يقوم فيه الجسم تنتج عن مواد كيميائية تسمى الپيروجينات تتدفق في مجرى الدم وتشق طريقها إلى ما تحت المهاد في الدماغ، المسؤول عن تنظيم درجة حرارة الجسم، وعندما ترتبط الپيروجينات بمستقبلات معينة في منطقة ما تحت المهاد، ترتفع درجة حرارة الجسم. (هون بتكون شرحتلها بشكل علمي صرف وما رح تفهم عليك)...

- بينما إذا بتعرف أنو غلط وقلتلها: يا تيتة أنا مصاب بمرض والجسم وقت المرض بحاول يقاوم المرض من جوا وبسبب هي المقاومة بترتفع حرارة الجسم بسبب التغيرات اللي عم تصير يعني عملية طبيعية وما ألها علاقة لا بالسحر ولا بالحسد ولا بفيدها أي شعوذة من اللي قلتيهم لأنو عملية طبيعية معروفة كيف وليش بلشت وكيف بتنتهي حتى في دراسات بتعتبر أنو الحرارة العالية بتساعد بمقاومة المرض لذلك لا تشغلي بالك وانسيلي هالخزعبلات يا تيتة.. (هون بتكون حكيت بأسلوب العلم الشعبي أو الپوپيولار ساينس Popular science)..

- أما إذا رحت دورت على دراسة معمولة على خمس أو عشر أشخاص لمدة يومين تلاتة لاحظت أنو هالخزعبلات أثرت قليلًا على تحسين الحالة النفسية تبع المريض.. قمت قلتلها معك حق تيتة الحالة النفسية مهمة للحالة العضوية بالتالي كلامك صح خليكي عم تآمني بالعين والحسد، فبتقوم ستك بتقلك تسلميلي يا حبيبي شو أنك مرضي (فهون بكون "العلم" الشعبوي Populist "Science")...

أرجو أنو تكون واضحة وحاجة كل خبصة تقولولي معليش هي پوپيولار ساينس.. ونعرف أنو كل ممارسة فيها حد من الغذاء رح نلاقي فيها فوائد بس كمان ممكن صفات تانية فيها ألها سلبيات ومن الأمانة العلمية ذكر السلبيات والإيجابيات وكيفية تعزيز الإيجابيات وتقليل السلبيات وعدم اللعب على المسميات العلمية بسبب التشابه بينها وجهل العامة فيها وعدم الاستشهاد بمصادر غير علمية وبعدين نقول شوفوا المصادر...

العلم الشعبي غير العلم "الشعبوي" والصيام المتقطع غير الصيام الجاف غير الصيام الديني (الإسلامي وغير الإسلامي) غير الصيام الإضرابي تبع غاندي غير الصيام التنسكي تبع بوذا... سانتا غير سيتان غير سانتانا!