دماغك يعمل بنسبة 100%

 

 

كُتبت في: 12/07/2019

ورحمة الغوالي إن دماغك يعمل بكل مناطقه وبشكل كامل تقريبًا وليس 10% فقط، وإيجادك طريقة سحرية "لتفعيل" مناطق أكبر من الدماغ لن يجعلك خارقًا ولن يجعلك "لوسي"!

الأفلام من الأشياء القليلة الجميلة في هذا العالم وتعتبر أفلام الخيال العلمي Sci-Fi من أكتر الأنواع التي بتجذب كتار منا، مع تحول العلم إلى ترند في آخر خمس سنوات (ترند محمود على خلاف عادة الترندز) بدأ العديد من الكتاب والمخرجين بالتحول من شطحات الخيال العلمي إلى بناء الحبكة على نظريات وفرضيات موجودة؛ بل بعض المخرجين تجاوز الموضوع وطلب إشراف علماء حقيقيين على الفيلم من الناحية العلمية..

بعض الأفلام قدرت  توصل أفكار علمية معقدة بطريقة حلوة وسلسة وكتير أفلام استخدمت أمور خطأ علميًا أو صحيحة لكن قدمتها بشكل خاطئ وهاد لا يعيب الأفلام لأنو مو مطلوب الصحة العلمية من الفيلم مع أنو تم الترويج للبعض من قبل المسؤولين عنها على أنها صحيحة علميًا بس بالنهاية المخرج ما قلك هاد مصدر علمي ولا قلك أنو فيك مثلًا تكتب:

Nolan, C. et al. (2014). Interstellar. Legendary Pictures, Syncopy, Lynda Obst Productions; 2h 49m

كمرجع لأي فكرة علمية بتقدمها..

وبهاد البوست حابب وضح نقطة مهمة صرت شايفها بأكتر من محل وهيي فكرة أنو الإنسان بيستخدم 10-20  بالمية من دماغو فقط وأنو كل ما قدر بطريقة ما يفعل جزء أكبر كل ما قدر يحرر قدرات أكبر قد تصل إلى حد أنو يتحكم بالوسط المادي اللي حولو إذا وصل للمية بالمية وهي الفكرة كتير بيستخدموها جماعة التنمية البشرية والبرمجة اللغوية العصبية بشكل مباشر أو غير بأنو على أساس عم يدربوك كيف بتستخدم نسبة أكبر من دماغك مباشر، وحتى جماعة الترويج لبعض أنواع المخدرات! طبعًا هاد الشي ترسخ بعقول الناس أكتر بعد أفلام تناولت هالفكرة وقدمتها على أساس أنها علم متل فيلم Lucy (2014) وفيلم Limitless (2011) وفيلم Phenomenon (1996). واللي بيعتمدو على فكرة أنو شخص ما صار معو حادث ما أو تناول عقار ما أعطاه القدرة على استخدام نسبة أكتر من دماغو بالتالي صار عندو قدرات خارقة للعادة..

للأسف هاد الشي مو صحيح ويعتبر خرافة علمية Scientific Myth، وللأسف حسب استبيان تم إجراؤو عام 2013 تبين أنو 65% من الأمريكان يعتقدون أنو البشر بيستخدموا 10% فقط من دماغهم.

طبعًا الأميريكان لا يعتبرون أكثر الشعوب ثقافة وإطلاع ولكن ممكن اعتبارهم عينة مناسبة، ونسبة 65% كبيرة!

طيب من وين بدأت هي الخرافة، من غير الواضح كيف بدأت، بس في كتير مصادر محتملة للموضوع. أحد هي المصادر هوي مقال تم نشرو بالعدد 1907 من مجلة Science، ادعى فيه مؤلف المقال William James بأن البشر ما بيستخدموا سوى جزء من قدراتهم العقلية، ومع ذلك ما حدد نسبة مئوية لهاد الجزء. الرقم تم تحديدو بكتاب لـDale Carnegie عام 1936 حول كيفية كسب الأصدقاء والتأثير على الناس اسمو How to Win Friends and Influence People وهوي نفسو صاحب كتاب How to Stop worrying and Start Living اللي لطشوا منو كتير كتاب عرب وألفوا كتب شبيهة ألو متل كتاب جدد حياتك لمحمد الغزالي، وكتاب لاتحزن للداعية عائض القرني، وكتاب استمتع بحياتك للداعية محمد العريفي، وكتاب الوسائل المفيدة للحياة السعيدة للداعية عبد الرحمن بن ناصر السعدي؛ وجميعها بما فيها الكتاب الأصلي الأميركي هي كتب تجارية لا قيمة علمية لها. طبعًا تكررت هالخرافة بكتير مقالات وبرامج تلفزيونية وأفلام، وهاد سبب انتشارها على نطاق واسع.

طيب شو الحقيقة؟

بمقابلة أجرتها المجلة العلمية Scientific American مع طبيب الأعصاب Barry Gordon صرح أنو الموضع خاطئ بل مضحك وأنو الدماغ بشكّل 3% من وزن الجسم لكن يستهلك 20% من طاقة الجسم لتشغيل ملايين الخلايا العصبية. 

على الرغم من أنو مناطق الدماغ متلها متل العضلات بتشتغل حسب الوظيفة المطلوبة يعني ما رح تكون كلها عم تشتغل (تخيل أنو كل عضلات جسمك عم تشتغل سوا!) لكن أظهر باحثو الدماغ باستخدام تقنية التصوير أنو مناطق الدماغ ينشط معظمها وباستمرار على مدار 24 ساعة. وحتى أثناء النوم ، في مناطق مثل القشرة الأمامية التي بتتحكم بأشياء مثل عمليات التفكير العليا والوعي الذاتي وغيرها تبقى نشيطة. 

طبعًا كمان في دراسة تم نشرها بمجلة Frontiers in Human Neuroscience عام 2009 دحضت هالخرافة.

كمان في تقنية تصوير نشاط الدماغ اسمها تقنية التصوير الوظيفي بالرنين المغناطيسي (fMRI)، بتقيس نشاط المخ أثناء قيام الشخص بمهام مختلفة. باستخدام هذه الطريقة وطرق شبيهة، أظهر الباحثون أن معظم دماغنا يتم استخدامو معظم الوقت، حتى لما بكون الشخص عم يقوم بعمل بسيط للغاية. مثلًا عمل بسيط متل صب فنجان قهوة: المشي تجاه القهوة، والوصول إلها، وصبها بالفنجان، وترك مساحة للحليب مثلًا هاد بفعل: الفصوص القذالية والجدارية بالدماغ، القشرة الحسية والحركية، العقد القاعدية، المخيخ والفص الجبهي. وبيصير متل عاصفة من نشاط الخلايا العصبية بجميع أنحاء الدماغ خلال بضع ثوان.

طيب هل ممكن الدماغ يتغير وكيف؟

الدراسة أو التدريب (يعني تشغيل الدماغ) بتعمل تغييرات بنيوية ووظيفية بالدماغ ما رح فوت فيها بس بشكل عام ممكن تحسن الترابط والتواصل العصبي بين مناطق الدماغ حسب دراسة جديدة تم نشرها هي السنة 2019. وكمان ممكن تزيد من مرونة الدماغ أو ما يسمى باللدونة العصبية Neuroplasticity عبر تغيرات فيزيائية بتساعدوا على تخزين معلومات أكتر وتسهيل التعامل معها (دراسة). وكذلك تغيرات متل زياجة بالمادة البيضاء بالدماغ White matter المسؤولة عن ربط الهلايا العصبية الموجودة بمناطق مختلفة بالدماغ بالتالي زيادتها بتسهل عملية الربط والتواصل العصبي.

بالختام فيي قلك يا عزيزي متابع ومصدق هي الأفلام أنو مهما صار معك ما رح تصير متل لوسي لا عقلًا ولا شكلًا لذلك ركز على دراستك وعلمك برضاي عليك  لأنو صدقني "حتحتاج تذاكر تاني" للأسف!