القمر الأحمر قادم وأنا كلي إيمان

كُتبت في: 27/07/2018

عام 1503 وصل كولومبوس عشواطئ ما يعرف حالياً بجمايكا واستقبلوه السكان الأصليين (هنود الأرواك Arawak Indians) وضلو يزودوه هوي وطاقمه بالأكل والشرب شي ست شهور مقابل صحون وصواني وحلي وشغلات هيك. بعد ست شهور ونتيجة زيادة السرقات والقتل من طرف جماعة كولومبوس وملل الأرواك من تقديم الأكل ألهم وانتشار المجاعات قرروا السكان الأصليين أنو ما عاد يزودوهم بالاكل وهون كولومبوس كان قدام مصيبة.

المهم كان في عالم ألماني اسمو يوهانس مولر ڤون كونيغسبيرغ Johannes Müller von Königsberg  (1436-1476) أو كما يعرف باسمو اللاتيني المستعار ، ريجيومونتانوس Regiomontanus كان عالم رياضيات وفلكي قبل ما يموت نشر روزنامة (تقويم) فيها جداول فلكية بتغطي السنوات من 1475-1506 لحركات الكواكب والتوافقات تبع الشمس والقمر والخسوف والكسوف وكولومبوس كان معو نسخة منها. 

المهم صاحبنا اتطلع عنسختو لاقى انو رح يصير في خسوف كامل للقمر مساء الخميس 24 شباط 1504. 

أخونا ما كذب خبر قبل تلات أيام من موعد الخسوف راح لعند زعيم قبيلة الأرواك وقلو أنو الإله غضب عليهم لأنهم ما عاد عطوهم أكل ورح يبعتلهم إشارة خلال تلات أيام وهيي أنو القمر رح يظهر مخسوف وملتهب غضباً "inflamed with wrath" وهاد رح يمكن الشيطان من السيطرة عليهم. 

وطبعاً بعد ما ظهر القمر بشكل كامل بلش ينخسف وظهر بلون أحمر وهون الأرواك بلشو يركضو يمين ويسار وتعهدو أنهم يزودوا كولومبوس ورجالو بكل شي بدهم ياه. 

القصة مو أنو معرفة بسيطة بالعلم خلت شخص واحد يتحكم بقبيلة كاملة بسبب معتقدها. لا هاد مو موضوعنا. 

موضوعنا هالسخافة اللي عم تنتشر هلأ وهالخوف اللي الناس خايفينو من مجرد ظاهرة جدددداً طبيعية وربطها بأمور دينية ممتزجة مع أساطير شعبية وخرافات. 

وإذا كانوا شعب الأنكا بيفكر وقت الخسوف أنو في جاكوار بلع القمر نحنا بنفكر أنو حوت بلعو. وهلأ بعد أكتر من 500 سنة بزمن العلم والتكنولوجيا  العالم لساتها خايفة من هيك شي وخود  ع صلوات خوفاً من زلازل وأعاصير يا بعدي. 

يعني يجي واحد متل كولومبوس مع حبة تكنولوجيا شعوبنا بتعبدو. هدول نفسهم اللي إذا قرؤوا قصة هنود الأرواك بقولو العمى ما أغباهم.