تسويق العلم

كُتبت في: 18/07/2017

بعالم البزنس والماركيتينغ يعتبر المستهلك هوي الهدف الرئيسي لكل شركة وكل عملية تسويقية لازم تمر بالخطوات التالية:

- مرحلة Segmentation أو التقسيم وهوي تقسيم سوق العمل ومعرفة ميزات كل فئة وقسم وتحديد كيفية التعامل مع كل فئة واهتماماتها

- مرحلة Targeting أو الاستهداف وهيي أنو بعد ما تحدد الفئة اللي ممكن تهتم بالمنتج أو الخدمة اللي عم تقدمها بتحاول جذب انتباه هي الفئة لأهمية منتجك

- بيجي بعدها مرحلة Persuasion أو إقناع المستهلك بأهمية هالمنتج وحاجتو ألو وأنو كيف هاد المنتج ممكن يقدملو شي مفيد 

- بعدها خطوة المقارنة Products Comparison وهيي كيفية إقناع هاد المستهلك انو يشتري المنتج منك مو من غيرك اللي عندو نفس نوع منتجك 

- وبعد إقناع المستهلك بهالشي بتجي خطوة Delivery او إيصال المنتج للمستهلك 

- وبعد إيصالو بتجي خطوة Customer Reviews متابعة رأي المستهلك بمنتجك وبآلية إيصال هاد المنتج. 

 

الفكرة أنو العلم كمان منتج وكمان بدو تسويق وكمان بتنطبق عليه المراحل السابقة:

- مرحلة Segmentation أو التقسيم: لازم يعرف الشخص صاحب المعلومة العلمية سواء كان باحث أو عالم أو بروفيسور أو قارئ المعلومة من كتاب أو طالب أو عن خبرة أنو مو كل فئات المجتمع على نفس سوية التلقي (وأقول التلقي وليس الثقافة أو العلم لأنو إيصال المعلومة لشخص مو بالضرورة يكون هاد الشخص مثقف يا بعدي لأنو كل ما كان الشخص بعيد عن تعقيدات الثقفنة (وليس الثقافة) كل ما كان عقلو مرن أكتر) بالتالي لازم نعرف كل فئة كيف ممكن تتلقى المعلومة وتتعامل معها..

- مرحلة Targeting أو الاستهداف: بهي المرحلة لازم تعرف كيف تجذب هالفئات لمعلومتك العلمية وأفضل طريقة للجذب هيي ربط المعلومة العلمية بحياتهم ومعاناتهم (أحد أسباب تفوق البروبوغاندا الدينية والسياسية على العلمية هوي ربط رجال الدين والسياسة منتجهم بكل نواحي حياة المستهلك وبأدق التفاصيل) يعني إذا بدي حاكي المواطن البسيط عن الاحتباس الحراري ما بجي بقلو بتعرف يا أبو فلان أنو من كم يوم انفصل أكبر جبل جليدي عن القطب الجنوبي بسبب الاحتباس الحراري، وبعدها بتطلع بعيونو بنظرة يملؤها العمق والحزن وبتقلو أنت بتعرف هاد شو يعني وبعدين بتنطر منو تفاعل وتعاطف وإعجاب في آنٍ معاً!! ببساطة ممكن يقلي والله يا خيي هاد ما بيعني شي بس ما يكون عفس بطريقو شي بطريق!! لذلك بدل من هالأسلوب ممكن اتبع أسلوب أبسط قليلاً وأكتر جاذبية مثلا متل خبر الغارديان (انفصال جبل جليدي أكبر بمرتين من لوكسمبورغ عن القطب الجنوبي) أو أبسط من هيك بكتييير قلو يا أبو فلان هالطقس الشوب والحريق اللي صاير مو جاي هيك عبث يعني يرحم أيام زمان لما الحرارة ما كانت تزيد عن 30، وقتها بيقلك إي والله معك حق فبتقلو لسه لقدام الوضع أسوأ ويمكن الأرض تغرق هون ببلش يهتم، وإذا حدا بحب الأفلام ممكن تقلو والله شكلو فيلم Waterworld مو مطول ورح يصير حقيقة.. في كتير طرق المهم تعرف تلاقي مدخل لاهتمام الشخص وما تفكر أنو لأنك صاحب معلومة فأنت أعلى مستوى وهي مشكلتو إذا ما فهم أو أنو إذا حاكيتو طلاسم رح تبين فهمان.. يعني مو تجي تحاكيه بالكاربون فووت برينتس وغيرها صدقني أخر همو إلا إذا عم يدفع عليها ضرايب متل بأوروبا وقتها بيصير يهتم بمعناها مو لأنو بكون مثقف أكتر بس لأنو لامست حياتو وجيبتو..

- مرحلة إقناع متلقي المعلومة بأهميتها Persuasion : وهي مرحلة بتجي بشكل تلقائي كاستمرارية للمرحلة السابقة وكمان بتعتمد عإيصال الفكرة بأسلوب بسيط ومرتبط بحياة المتلقي.. العلم بعاني من شغلة بتصعب انتشارو وهيي أنو بيعتمد عالحقائق مو المشاعر يعني الدين والسياسة بيعتمدو أسلوب اللعب عالمشاعر بشكليه الترغيبي والترهيبي بينما العلم إذا اتبع أي من الشكلين بيفقد رسالتو.

- خطوة المقارنة Products Comparison: وهي المرحلة الصعبة أنو يا أخي كيف بدك تقنع المتلقي ياخد المعلومة منك مو من المنافس اللي ممكن يكون العادات أو التقاليد أو العلم الزائف أو الدين أو السياسة... كيف ممكن تقنع الشخص اللي عندو زيادة وزن أنو الرياضة وأسلوب الحياة الصحي هوي الحل الوحيد لخسارة الوزن بطريقة صحية لكن بطيئة وأنو ما في حبوب سحرية لخسارة الوزن وأنو منقوع البقدونس والفجل مو علاج سحري لحرق الدهون.. كيف بدك تفهم الشخص الطيب البسيط أنو مرض ابنو أو بنتو هوي بسبب فيروسات أو تسمم غذائي مو صيبة عين أو غضب من الله وأنو علاجو عند الطبيب مو عند رجل الدين أو المشعوذين.. كيف بدك تقنع الشخص البسيط أنو الزلازل مو انتقام إلهي وأنو عطارد آخر همو تجوزت أو تركت حبيبتك وأنو القطة السودة مو سبب خسارتك لشغلك وأنو رقم 13 هوي مجرد رقم بين 12 و14 وأنو وأنو...

- خطوة ال Delivery أو إيصال المعلومة للمتلقي: يا أخي أنت عبقري وصارف سنين عمرك على بحثك ومطلع نتائج يطول شرحها بس هاد ما بيهم المتلقي، المتلقي متل الزبون، إذا كنت مهندس معماري وطلب منك زبون مخطط لبيت ما بهمو تقلو قديش سهرت ليالي لرسمو بهمو بالآخر ياخد هالمخطط وهون نفس الشي أنت معك خمس دقايق توصل الفكرة وبكل بساطة ولا تفكر إذا المتلقي فهم فكرة بحثك أو معلومتك فوراً معناها بحثك تافه أبدا (أبسولوتلي بصوت اللمبي) هاد بيعني أنو بحثك متكامل ونتائجك مقنعة وبتميك سينس.. وهون لا بد أن نذكر دكاترة الجامعات أحبابنا.. أحبائي الدكاترة والله واللي اسمو الله أنو الطالب يعيد المادة تريليون مرة وما ينجح ويحضر ديشيليار محاضرة وما يفهم ممكن يعني كتيييير شغلات بس صدقوني ما بيعني أنو أنتو عباقرة وأعلى مستوى من الطلاب أو أنو مادتكم هيي حجر الزاوية للعلم الحديث (أكتفي بهذا)..

بقول أنشتاين : “If you can't explain it to a six year old, you don't understand it yourself.” إذا ما فيك تشرح فكرتك لولد عمرو ست سنين فأنت مو فهمانها!!

- خطوة ال Customer Reviews أو متابعة رأي المتلقي: حبيبي صاحب المعلومة أنك ترمي المعلومة وتدير ضهرك وتهرب هاد مو أسلوب والمعلومة مو رمانة يدوية هجومية .. بعد إعطاء المعلومة اسأل المتلقي أو الطالب عن رأيو فيها أو شو فهم أو شو الأسلوب اللي بفضلو مشان يفهما أكتر أو شو ممكن نستفاد منها والأهم إذا خالفك الرأي لا تهدرلو دمو لا حرفياً ولا فكرياً..