تأثير الپلاسيبو placebo effect

 

كُتبت في: 31/07/2019

في بلدة كان فيها شخص يتمنفخ كتير (يتباهي بأشياء ما فيه يعملها) وعلى طول شالش أهل البلدة بأنو أنو فيه يعمل كذا وما في شي ما بيقدر عليه لحتى إجا يوم ضاجوا أهل البلدة وقرروا يشتكوه لعمدة البلدة. سمع عمدة البلدة الشكوى وسألهم أنتو متأكدين أنو هوي شخص كذاب ومو قادر يعمل هالشغلات اللي عم يدعيها؟ جاوبوه أنو ولا مرة شافوه عمل أي شي من اللي عم يدعيه. فقرر عمدة البلدة يختبرو، بعت وراه وقلو يا فلان في بأعلى الجبل أرض كلها صخر وغير صالحة للزراعة بسبب الصخر الكبير اللي فيها، هل عندك قدرة تكسر هالصخر وتشيلو منها؟ جاوبوا هالمنفاخ "طبعًا بكل سهولة، بس عندي شرط واحد" سألو عمدة البلدة شو شرطك؟ جاوبو أنو مو متأكد من الطريق لهيك رح ياخد معو مجموعة من الأشخاص مشان يضمنو وصولو للأرض المطلوبة ويساعدوه بشيل الصخر المكسر مشان السرعة، قلو العمدة "ما في مانع".. حمل حالو هالمنفاخ وجاب معو 20 شخص وراح طلع عالجبل، بآخر النهار رجع وخبرهم أنو تم إنجاز المهمة بنجاح وأنو هوي شخص قوي وكسر الصخر لحالو، وصار يتمنفخ أكتر من أول بعشر أضعاف.. ضجت العالم وراحت اشتكت مرة تانية لعمدة البلدة، اللي استدعاه مرة تانية وطلب منو ينضف أرض تانية شبيهة بالأولى من الصخور الكبيرة اللي فيها، هاد المنفاخ وافق طبعًا مع الشرط نفسو، وتاني يوم جمع رفقاتو نفسهم وطلعو عالجبل وخلال نفس المدة رجع وبلش يتمنفخ كيف نضف هالأرض لحالو وكسر الصخور.. الناس ما عادت تحملت وقالت لعمدة البلدة لهون وبس، عمدة البلدة قلهم "طولو بالكم رح اكشفلكم صدقو من كذبو، جيبولي رفقاتو لحالهم"، راحوا أهل القرية وجابولو العشرين شخص اللي عطول بروحوا معو، قلهم عمدة البلدة "في أرض تالتة متل الأرضين اللي قبل، روحوا عليهم لوحدكم وعملوا تمامًا اللي عملتوه لما كنتو مع المنفاخ"، الشباب ما كذبوا خبر راحوا عالأرض التالتة وبعد نفس المدة رجعوا عالقرية سألوهم شو الوضع قالولهم الأرض نضفت.. هون عمدة القرية قلهم "شفتوا كيف، هلق صار فينا نقول ونحنا متأكدين أنو هالمنفاخ ما ألو أي قوة من اللي عم يقولها وأنو السر مو فيه السر باللي معو".. تاني يوم أهل القرية قرروا يكملوا تنضيف الأراضي من الصخور وقرروا يبعتوا هدول العشرين شخص يكملوا شغل، ولما واحد من القرية سأل عمدتها "شو مشان المنفاخ، بنطلب منو يروح مع الشباب؟" رد عليه عمدة القرية "لا، بلاه سيبو" يعني تركو، ومن وقتها صار هالمنفاخ اسمو "پلاسيبو"..

انسوا كل هالحكي الفاضي فوق وخلونا نحكي عن تأثير الپلاسيبو placebo effect...

أول شي ما هو البلاسيبو؟

كتسمية فهيي مأخودة من نص لاتيني موجود بالإنجيل بمعنى (I shall please) (مصدر)، ولاحقًا ارتبطت كمسمى للشخص اللي بيدعي زور أنو له صلة بالمتوفى للحصول على جزء من طعام الجنازة، ولاحقًا تعمم المعنى وارتبطت بالمتملق والمخادع (مصدر).

علميًا الپلاسيبو ببساطة هوي (الدواء الوهمي) وهو أي شيء يبدو أنه علاج طبي "حقيقي" - لكنه ليس كذلك. يمكن أن يكون حبة، جرعة، أو نوع آخر من العلاجات الوهمية، وما يجمع بين جميع الأدوية الوهمية هو أنها لا تحتوي على مادة فعالة لها تأثير على الصحة (مصدر). باختصار: أي دواء أو إجراء زائف مصمم بحيث لا يحتوي أي قيمة علاجية معروفة (مصدر).

هاد العلاج الوهمي يعطى أثناء التجارب لبعض المشاركين بالدراسة لمعرفة إذا كان للدواء تأثير حقيقي أو لا، يعني إذا عنا دواء جديد لمعالجة الاكتئاب يعطى جزء من المشاركين هاد الدواء والجزء التاني يعطى الپلاسيبو اللي بكون شكلو متل الدواء الأصلي نفس اللون والشكل والطعم لأنو بيحتوي كل المكونات الحاملة للدواء ما عدا المادة الفعالة المراد معرفة تأثيرها، وطبعًا ما حدا من المشاركين بيعرف ما إذا كان اللي أخدو هوي دواء أصلي أو پلاسيبو ببساطة الكل بيعرف أنو أخد الدواء الأصلي، بعدها الباحثين بيدرسوا ردة فعل المشارك وتأثرو بهاد الدواء؛ في حال ما كان في فرق بين تأثير الدواء الحقيقي والپلاسيبو بالتالي الدواء غير فعال حتى لو الاثنين سببوا تحسن لأنو بهي الحالة التحسن ما بكون سببو المادة الفعالة بالدواء بل عامل نفسي وهوي أنو المريض حس أنو تحسن بس لأنو أخد الدوا وهاد هوي ما يسمى "تأثير الپلاسيبو" واللي فيه بكون ردة الفعل وهمية مو حقيقية، متل أنك تحس أنو بطنك بلش يوجعك في حال عرفت أنو الحليب اللي شربتو خالصة مدة صلاحيتو حتى لو ما فيه شي..

في دراسة حول تأثير الپلاسيبو على الربو، الأشخاص الذين استخدمو جهاز الاستنشاق الوهمي كانت اختبارات التنفس تبعهم ما كانت أفضل من الأشخاص اللي ما أخدوا أي معالجة، بس لما سألهم الباحثون عن شعورهم، خبروهم أنو جهاز الاستنشاق اللي استخدموه مفيد متل الدواء اللي بياخدوه عادةً (مصدر).

ركزت الأبحاث حول "تأثير الپلاسيبو" على العلاقة بين العقل والجسم. وحدة من النظريات الأكثر شيوعًا هيي أن تأثير الدواء الوهمي يرجع إلى توقعات الشخص أنو رح يتحسن بعد تناول الدواء، يعني متل ما الشخص بركز على وجع البطن إذا فكر أنو تسمم وبيصير يحس أي نخزة وجع بطن كمان اللي بيتوقع أنو رح يتحسن بيصير يركز عالإيجابيات.. 

في كتير حالات بكون للپلاسيبو تأثير عليها متل حالات الكآبة، بعض الألام، اضطرابات النوم، متلازمة القولون العصبي، سن اليأس، وفي أدوية تعطى هيي عبارة عن پلاسيبو متل بعض مسكنات الآلام وبعض أدوية القلق والكآبة، وبعض الحالات اللي بتكون أمراض مزمنة بتعطي دوا لشخص تحت المراقبة مشان يشعر بالتحسن (مصادر A, B, C, D).

طيب شو الشيء التاني اللي ممكن يسبب تأثير وهمي وألو تأثير شبيه بالپلاسيبو؟ ببساطة الظروف المحيطة بالمادة المدروسة، مثلًا ممكن تكون أنت حابب تشوف فعالية طريقة معالجة ما ولكن لحتى تطبق هالطريقة لازم تقدمها بظروف معينة هي الظروف ممكن تكون ألها تأثيرات إيجابية هيي اللي تسبب تحسن مما بيعطي فكرة خطأ أنو المادة المدروسة هيي الفعالة وبتعطي تأثير وهمي ألها.. متل مثلاً أنك تكون نعسان وحدا يعطيك كاسة قهوة فبتحس أنك صحصحت بعدين تكتشف أنو القهوة ديكاف (يعني بدون كافيين يعني بدون المادة الفعالة اللي مفروض تصصحك).. طيب هون كيف ممكن نعزل تأثير الوسط المحيط ونكشف هل للمادة المدروسة تأثير حقيقي أو وهمي؟

الموضوع بسيط كتير، بنطبق اللي طبقو عمدة البلدة مع المنفاخ فوق، بنجيب عينة فيها جميع مكونات المنتج أو العقار أو المعالجة ما عدا المادة المدروسة وبنجربها بدون إخبار المشاركين بالتجربة وبنشوف إذا في فرق بالتأثير...

طيب هل الپلاسيبو هوي بس دواء أو علاج طبي؟ طبعًا لا بهالحياة في كتير تأثيرات پلاسيبو وأشياء وهمية ومنافيخ..

بس ما رح أطلع برا الموضوع العلمي ورح أعطي مثالين عن الپلاسيبو...

حميات الديتوكس أو حميات تنظيف السموم واللي الكل سمعان عنها واللي بشكل مبسط بتعتمد على التوقف عن تناول الطعام لفترات طويلة وتناول بس خضار أو فواكه نيئة أو حتى الاكتفاء بشرب الماء بس مخلوط بليمون وأعشاب وهيك شغلات وبلا إضافة النشاط الرياضي كشرط. بالرغم من أنو كل الحميات الجديدة اللي صايرة موضة هيي حميات تم الترويج ألها من قبل ناس منفوخين إعلامياً دون الاعتماد على بحث أو شي إلا أنو في أبحاث انعملت عنها لاحقاً ولاقت أنها حكي فاضي لأنو الجسم بيمتلك آليات متطورة وفعالة جداً في تنظيف وتنقية السموم وإخراجها عن طريق أجهزة إطراح مثل الجلد والأمعاء والكبد والكلى بالإضافة أنو هيك حميات ألها أضرار صحية بسبب نقص مغذيات رئيسية. هلأ هون بيجيك شخص بقلك أنو بعد اسبوع حس براحة وتنشط ومرتاح عالوضع بالتالي الحمية صحيحة وصحية. وهون بنرجع لتأثير الپلاسيبو الناتج عن التوقعات أولًا والناتج عن الظروف المحيطة بتطبيق هالحمية تانيًا يعني أنو أنت لما قررت تتبع هالحمية غيرت أسلوب حياتك ونظامها مثلا تركت الدخان وقفت الوجبات السريعة والمعجنات وقفت السكريات والدهون المشبعة وهاد السبب اللي خلاك تحس بهالنشاط أول كم أسبوع مو حمية الديتوكس. 

الموضوع التاني ما يسمى البرمجة اللغوية العصبية والتنمية البشرية، بهيك جلسات اللي معتبرينها علم بينما هيي علم زائف بيصير كتير رفع معنويات وحكي ذو توجه إيجابي ممكن تسمعوا من أمك أو أبوك أو رفيقك أو بكتاب هاد الكلام هوي اللي فعليًا خلاك تحس أنك صرت أحسن أو أكثر رغبة بالقيام بالشيء وهاد الشي ما بيعني أنو في شي فيك تغير أو تبرمج أو أي شي، يعني الموضوع تحفيز كلامي لا علم ولا غيرو ولا ألو أسس علمية وهالأموال الضخمة اللي عم تنطلب على الدورات والشهادات الوهمية والمسميات الضخمة من مؤسسات ومدربين وهميين هيي حرفيًا بيع كلام أو بالأصح بيع پلاسيبو..

لذلك إذا شفت أي منفاخ من هدول نصيحتي إلك (پلاه سيبو)..