الكورونا ما بين إيتاتشي وريوك!

 

كُتبت في: 26/02/2020

يعتبر تفشي الكورونا والتغطية الإعلامية لانتشاره من أسرع الظواهر حاليًا وهاد الشي مو لأنو هالوباء one of a kind وما صار أو رح يصير متلو بل ببساطة لأنو نحنا حاليًا بعصر السوشال ميديا العامة اللي أي شخص مين ما كان يكون قادر ينشر اللي بيرغب فيه مهما كان، لا يهم الشهادة لا يهم التخصص لا يهم صحة الكلام أو مرجعيتو لا يهم شي، يكفي أنك تكون محقق شرطين: عندك أكسيس عالسوشال ميديا، وبتعرف تستخدم مهارتي العصر (نسخ- لصق) ((فاصل إعلامي: روح يا Larry Tesler* يرحم ترابك ويبشبش الطوبة اللي تحت راسك شو عملت لعالم قيمة))..

الفكرة أنو في وباء تاني تفشى بشكل أسرع من تفشي الكورونا وهو Outbreak مرافق ألو لكن من نوع آخر أخطر وأوسع انتشارًا، وباء تاني يحمل صفات أخطر من الكورونا:

- الكورونا مرض ڤيروسي بينما هاد مرض فكري وثقافي واجتماعي..

- الكورونا ينتقل بالطرق التنفسية بينما هاد ينتقل بالكلام والأفكار..

- الكورونا يتفشى في المنطقة التي يتواجد فيها حالة مصابة بينما فالمنطقة بالأساس مصابة ومجرد وجودك فيها بيجعلك عرضة لهذا المرض..

- الكورونا فترة الحضانة تبعه حوالي 14 يوم بينما هاد المرض هوي اللي بالأساس حاضن للإنسان لأنو الإنسان بيولد بالبيئة الحاضنة لهالمرض..

المرض اللي عم أحكي عنو هوي مرض الجهل والتنظير ونظريات المؤامرة الإلهية والبشرية...

كتير ناس عندها ثقة (سلبية) بالعلم وهالثقة السلبية عم تتطور.. يعني قديمًا كانوا هدول الفئة لما المرض يطول أكثر من عشر سنين وما حدا يلاقيلو علاج يقولو عنو أنو هاد المرض عاملينو البشر لغايات معينة متل السرطان والإيدز وغيرو.. وحاليًا لما المرض صار يطول يومين بلا ما حدا يلاقيلو علاج صار برأيهم أنو المرض مصنّع من قبل الإنسان بشكل مقصود.. هدول الفئة عندهم ثقة (سلبية) بأنو العلماء أكيد قادرين يلاقوا علاج لكل شي وأنو أي شي بلا علاج فإما العلماء هني عاملينو أو قصد ما بدهم يلاقولوا علاج.. وبالرغم من أنو كل كلامهم يصب على أنو الحل موجود عند العلماء بتلاقيهم أبعد الناس عن العلم وعندهم قناعاة سخيفة متل أنو بذر المشمش بعالج السرطان واليانسون بعالج الكورونا ومن هالسخافات...

بس كلو كوم وجماعة نظرية المؤامرة العلمية كوم.. شيلونا من موضوع أنو بالنسبة ألهم كل مرض بيطلع هوي وسيلة من الغرب للقضاء على فئة ما أو دولة ما وخلونا نحلل موضوع الكورونا شوي...

انقسم الناس في موضوع الكورونا بين عالم اعتبروه إيتاتشي** وعالم اعتبروه ريوك***:

- جماعة إيتاتشي: بيعتبرو الوباء مرض جاي يفتك بالأوتشيها بس ألو أسباب مقنعة وعلمية تفسر سبب حدوثو وتطورو بدون وجود ما ورائيات يعني هني الجماعة العلمية اللي اعتبرت المرض وبائي ورح يحصد بشر كتير بحيث وصل العدد حسب محاكاة Event 201 simulation لـ65 مليون شخص.. محاكاة أخدت المرض وطبيعتو وظروف انتشارو والعوامل المحتملة لمساعدة أو عرقلة هاد الانتشار وقارنوها مع أوبئة مشابهة يعني شي معتمد على العلم.. لكن عادة هيك حسابات بتصير قياسًا على الظروف المتوفرة بينما مثًلا إذا تم التوصل لعلاج أو حل (واللي رح يكون عبر تدخل ناروتو (العلم) وناروتو فقط) فالظروف تتغير ورح يقتنع إيتاتشي يخف إيدو عن الأوتشيها شوي..

- جماعة ريوك: وهدول هني جماعة نظرية المؤامرة.. وهدول كمان انقسمو قسمين:

 (أ) قسم نظرية المؤامرة الإلهية: وهدول جماعة (ريوك مباشرة بلا واسطة) اللي قالوا أنو هالوباء انتقام من "السماء" (على قولة الأفلام) لمعاقبة الصينيين، واللي بعد كم شهر لما بلش ينتشر بيناتنا تحول لإبتلاء من "السماء" (طبعًا ما تغير شي بالوباء لكن تغيرت الضحية.. وهي هيي المغالطة المنطقية اللي كان لهدول الجماعة شرف اختراعها من زمان وهيي مغالطة القياس على الضحية لا على الجاني.. يعني نفس الجاني، إذا الضحية بتخصنا فهاد إجرام وابتلاء وإذا الضحية ما بتخصنا فهاد عقاب).. 

(ب) قسم نظرية المؤامرة العلمية: وهدول جماعة (ريوك بس بواسطة كيرا***) وهدول بالنسبة ألهم هاد المرض (الفريد من نوعو) من إنتاج مخابر الغرب وأميريكا لضرب الصين ولاحقًا بس ينتشر عنا رح يقولوا أنو لضرب الشرق الأوسط...

طيب خلونا نفكر فيها شوي.. هل هاد الوباء مصنّع بشريًا لغايات في نفوس اليعاقيب (جمع يعقوب: ويعقوب هو من يعقب غيره فتقول الروايات أنو يعقوب كان ألو أخ توأم ولد قبلو وعقبه في الولادة يعقوب فسموه يعقوبًا).. المهم.. هل هذا الكلام ممكن؟

للأسف لا (وأقول للأسف لأنو إذا كان مصنع بشريًا فقد يكون هنالك أمل شبه أكيد أنو تم تصنيع مضاد ألو قبل نشرو المزعوم)...

طيب ليش لا.. لأنو ببساطة إذا أرادت جهة نشر مرض فلن تنشره بالخصائص الآتية:

- مرض ڤيروسي يعني انتشار سريع، علاج صعب، قابل لتطوير سلالاتو، قابل للانتقال بين الكائنات الحية، يستطيع أن يسبب طفرات، قادر على التهجن مع غير ڤيروسات..

- يكون airborne وينتقل بالتنفس وهاد من أصعب الطرق من ناحية أنك تقدر تضبطها..

- نشروا وسط فئة تعتبر أساس أكبر الجاليات في كل أنحاء العالم.. يعني الجالية الصينية موجودة في كل مكان لذلك نشرها بين الصينيين اللي عددهم بالصين مليار ونص (1,408,526,449 صيني بالضبط) وحوالي 50 مليون صيني برا الصين هاد بيضمن انتشاروا في كل العالم.. وهاد اللي صار..

غير هيك فمن الواضح أنو هي الدول اللي المفروض هيي اللي اخترعت الفايروس ما عملت إجراءات وقائية وهيي من أوائل الدول اللي وصلها سواء أميركا أو ألمانيا أو بريطانيا أو فرنسا أو غيرها..

طيب هي الدول إذا بدها تحارب الصين أو غيرها عبر الفايروس بأنو تأثر على اقتصادها وسياحتها كان ببساطة فيها تستغل أي حجة وتقطع التعامل الاقتصادي مع الصين وكمان تمنع الطيران بينها وبين الصين وكلنا بنعرف أنو لما بدها أي دولة تدبر حجة بتدبر... وخاصة أنو الدول الأوروبية رح تتأثر سياحتها جدا، على سبيل المثال فرنسا، وحسب تصريح "لو ماري" وزير الاقتصاد الفرنسي انخفاض عدد السواح بفرسنا بحوالي 30-40 بالمية بسبب الكورونا والذي سيمنع 2.7 مليون صيني كانوا يقومون بالسياحة في فرنسا كل عام من القدوم إليها هذا العام..

طيب بعيدًا عن الأمور الاقتصادية والسياسية.. هل تفشي الكورونا فعلًا شي one of a kind وما صار متلو قبل.. للأسف صار كتير متلو وأضرب سابقًا وهي قائمة بسيطة ببعض الأمثلة عن الأوبئة من الأحدث إلى الأقدم:

- وباء فيروس نقص المناعة البشرية / الإيدز HIV/AIDS Pandemic (في ذروته ، 2005-2012): عدد الوفيات 36 مليون.. انتشر من الكونغو إلى العالم.

- جائحة إنفلونزا الخنازير (2009) H1N1: عدد الوفيات 150-575 ألف شخص، انتشرت من المكسيك..

- جائحة إنفلونزا الطيور (2006,2007,2008,2009) H1N1: عدد الوفيات 263 شخص، انتشرت من آسيا إلى العالم وخاصة الصين ومصر واندونيسيا وباكستان وفيتنام..

- جائحة إنفلونزا هونغ كونغ FLU PANDEMIC/ The Hong Kong Flu (1968): عدد الوفيات 1 مليون.. انتشر من هونغ كونغ إلى العالم.

- وباء الإنفلونزا الآسيوية Asian Flu (1956-1958): عدد الوفيات 2 مليون.. انتشر من الصين إلى العالم.

- جائحة الإنفلونزا Flu Pandemic (1918): عدد الوفيات 20-50 مليون.. انتشر في العالم.

- جائحة الكوليرا السادس Sixth Cholera Pandemic (1910-1911): عدد الوفيات أكثر من 800 ألف.. انتشر من الهند إلى الشرق الأوسط وشمال إفريثيا وأوروبا الشرقية وروسيا.

- جائحة الإنفلونزا الروسية/ الآسيوية Russian Flu/ Asiatic Flu (1889-1890): عدد الوفيات 1 مليون.. أول ثلاث حالات كانت في تركسان وكندا وغرين لاند ومن ثم إلى العالم..

- وباء الكوليرا الثالث Third Cholera Pandemic (1852–1860): عدد الوفيات 1 مليون.. انتشر من الهند إلى العالم.

- الموت الأسود (الطاعون) (1346-1353) THE BLACK DEATH (Bubonic Plague): عدد الوفيات 75-200 مليون.. انتشر في أوروبا وإفريقيا وآسيا.

- الطاعون الأنطوني (165 م) Antonine Plague: عدد الوفيات 5 مليون.. انتشر في آسيا الصغرى ، مصر ، اليونان ، وإيطاليا..

طبعًا في أمراض تانية متل السارس SARS واللي كان انتشاروا محدود حدث عام 2003 وكان عدد الإصابات 8422 والوفيات 926 (11%). وحاليًا كورونا 2019-nCoV (COVID-19) حتى لحظة كتابة هذا الپوست الإصابات 81234 والوفيات 2769 (3.4%).

لذلك برضاي عليكم خلوكم من جماعة إيتاتشي وخلوا أملكم كبير بناروتو لأن (ناروتو هو الحل).. أما جماعة ريوك فديروا بالكم لأنو بالنسبة لريوك كل هالموت هوي وسيلة للترفيه عنو بسبب مللو في أرض الشينيغامي "فوق"...

................

* الحجي Larry Tesler: مبتكر أوامر (القص والنسخ واللصق) “cut, copy and paste” commands- وفاة 16 شباط 2020 (يعني من عشرة أيام)..

** إيتاتشي أوتشيها Itachi Uchiha: نينجا منتقم حصد أرواح عشيرة الأوتشيها، ناروتو أوزوماكي Naruto Uzumaki (Naruto (1999-2014))

*** ريوك Ryuk (الشينيغامي): إله موت وحاصد أرواح نزل للأرض للتسلية بمراقبة موت البشر بواسطة إعطاء بعضهم قوة عبر مفكرة موت، كيرا Kira: حامل ومستخدم المفكرة (Death Note (2006-2007))..