احذروا فخ الديسكليمر...

 

كُتبت في: 07/07/2020

الديسكليمر Disclaimer وترجمته الحرفية (التنصل) وتعني التملص أو الهروب من مسؤولية ما باستخدام هذا الديسكليمر..

له تعريف رسمي واللي هوي حسب Cambridge Dictionary:

a formal statement saying that you are not legally responsible for something, such as the information given in a book or on the internet, or that you have no direct involvement in it

يعني تصريح رسمي يفيد بأنك لست مسؤولًا قانونيًا عن شيء ما، مثل المعلومات الواردة في كتاب أو على الإنترنت، أو أنه ليس لديك مشاركة مباشرة فيه..

هاد النوع من الديسكليمر يستخدم بشكل رسمي من قبل الشركات والأشخاص لتجنب أي مسؤولية قانونية لشيء قد ينتج عن المنتج تبعهم لم يتم تحديد مسؤوليتهم عنه ضمن العقد أو ضمن القوانين المرعية.. متل أنو الشركة تحدد نطاق مسؤوليتها ببنود ضمن العقد ومن ثم تحط ديسكليمر بقول (نحن لسنا مسؤولين عن أي شيء لم يرد في العقد) أو مثلًا تنشر معلومات بمقال منقولة عن شخص ما ومن ثم تحط ديسكليمر بقول (جميع البيانات والمعلومات المنقولة عن هذا الشخص هي على مسؤوليته وليست على مسؤوليتنا)...

وله تعريف أقل رسمية أو عامي، وهو a statement that denies something, especially responsibility أي أنه تصريح ينكر شيئًا ما، وخاصةً المسؤولية.. وهاد عم نشوفو كتير عالنت متل اللي بقول مثلا:

(أنا لا أدعو لإيذاء أحد ولا أبرر إيذاء أحد، ((ولكن)) أحب أن أقول أن هذه الفئة مثلًا كافرة أو مثلًا شاذة أو مثلًا تشكل خطر على المجتمع أو مثلًا جزء من المشكلة أو أو أو أو)...

هون الشخص استخدم ديسكليمر مشان إذا حدا قال أنت عم تحرض على فئة ما، يطلع هوي أو أحد مؤيدي فكرتو ويقول (أنتو ليش ما بتقرؤوا كل الكلام هوي ذكر أنو ما عم يحرض) وفي نفس الوقت بكون وصل السموم اللي بدو يوصلها مع تجنب المسؤولية...

يعني متل اللي عم يقلك (مع احترامي الشديد ألك وتأكيدي على أهمية احترام شخصك واحترام حرية رأيك، ((بس)) أنت إنسان تافه وحقير وإذا حكيت فأنت دمك هدر).. أنا هون شو بكون استفدت من كل عبارتك (مع احترامي الشديد ألك وتأكيدي على أهمية احترام شخصك واحترام حرية رأيك)...

الديسكليمير مهم ونجح في تجنيب الشركات غرامات بملايين الدولارات، ولكن في كثير من الأحيان يصبح فخًا لتجنيب العديد من المجرمين (مجرمي التحريض خاصة) عشرات من سنوات السجن والعقوبة.. فلا تقعوا في هذا الفخ...

وتذكروا دومًا..

كل ما بعد (However, but, لكن، بس) هو حقيقة كلام القائل..

كل ما قبل (However, but, لكن، بس) هو ديسكليمر وتمسيح جوخ وتخفيف من وقع الكلام..