الوصف أهم من الموصوف.. الصيامات والخلط بينها

كُتبت في: 22/05/2018

الوصف أهم من الموصوف أحياناً خاصة عند نقل الخبر يعني إذا بدك تنصح حدا بسيارة معينة ما بيكفي تقلو بنصحك بسيارة لأنو محركها ممتاز وبتشتغل كتير بالتنكة لأنو الجملة ناقصة، لازم تقلو بنصحك بسيارة مارسيدس أو أودي أو ڤولڤو لأنو كذا وكذا وكذا.. لأنو مميزات سيارة ما ما بتنطبق عكل السيارات بالتالي أي شي بتحكيه بعد كلمة سيارة ما ألو معنى إذا ما حددت مواصفات الموصوف..

كذلك غذائياً.. بالبحث العلمي مو كلو عند الباحثين صابون.. يعني في قسم بأي دراسة اسمو materials and methods لأو methodology أو شي من هالمشتقات لازم الباحث يوصف بدقة متناهية شروط التجربة والطرق المتبعة ومواصفات المواد المستخدمة والأجهزة المستعملة ومواصفات العينة المدروسة والشروط المحيطة..

يعني مو أي دراسة فيها (Fasting, Fast, Fasts) واللي بيترجمو صيام بتنطبق نتائجها على الصيام الديني (الرمضاني).. فعلى سبيل المثال لا الحصر عندك:
-صيام العصائر Juice Fasts: ما بتم فيه أكل أي شي صلب والاكتفاء بالماء وعصائر الخضار والفواكه وبيستمر من يوم لأسبوعين بطريقة مدروسة.
- صيام الماء Water Fasts: الاكتفاء بشرب الماء بس لفترة معينة.
- صيام التنظيف أو التطهير Cleansing Fasts: الاكتفاء بشرب ماء مع ليمون وأحياناً أنواع شاي وشوية سكر مشان الطاقة 6-12 مرة باليوم وبيستمر من يوم ل14 يوم.
- الصيام على السوائل البروتينية Liquid Protein Fast: يعني ما بتم تناول شي غير السوائب البروتينية
- الصيام على السوائل Liquid Fasts: وبيشمل الأربعة المذكورين أعلاه
- الصيام المتقطع Intermittent Fasts: وألو عدة طرق إما تناوب فترات تناول طعام وفترات انقطاع عنو مع شرب الماء طبعاً او تقليل كمية السعرات الداخلة ل500-600 حريرة بأيام محددة بالأسبوع أو المتناع عن الأكل لمدة 24 ساعة يومين بالأسيوع
- الصيام الجاف Dry Fasts: التوقف عن الطعام والشراب لمدة 12-24 ساعة وعادة لا ينصح به أكتر من 7 أيام.
- الصبام من أجل التشخيص الطبي Diagnostic Fast: التوقف عن الأكل والشرب ما عدا الماء لمدة 8-12 ساعة مشان تعمل تحاليل
- الصيام الجزئي Partial Fasts: يعني الصيام عن شغلات محددة بس متل الرز أو القمح أو اللحم.
وفي مصطلحات كتير متل Occasional Short Fasts وLonger Fasts و Extended Fasts وOpen-ended Fasts و24-hour Fasts.

وكل ما ذكر أعلاه ألو شروط وطرق تحضير وإجراءات وسعرات مسموحة وأغذية مسموحة وفترات تناوب ومو كلها صحية وفي منها عبارة عن موضات...
بس الأهم أنو أي دراسة بدك تعتبرها عن الصيام لازم تسأل حالك:
- هل الدراسة تم إجراءها صح؟
- هل حجم العينة كافي ومناسب؟
- هل شروط التجربة صحيحة؟
- هل مدة التجربة كافية؟
- هل نتائج التجربة ثابتة ومهمة إحصائياً؟
- هل الجهة الممولة محايدة؟
والأهم: شو نوع الصيام اللي عم ينحكى عنو.. لييييش لأنو مو حلوة يكون كل شي عندك صابون هناك مواد تنظيف أخرى يا عزيزي!

وخلي الحكم عقلك مو عاطفتك لأنو العلم ما بجامل لا أشخاص ولا عادات ولا جماعات وكشف أي خبر ملفق بيضر بالموضوع اللي تلفق مشانو الخبر أضعاف مضاعفة..